Aizawl: Excise & Narcotics Department (END)-in kum 1995 atanga an chhinchhiah chinah Mizorama heroin man tam ber kum a thleng mek a, kumin thla kua chhunga an man tawh zat chu kg 19.97 a tling a. Kumin chhungin Mizoramah ruihhlo hman sual vanga thi mi 39 an awm tawh a, police hotute chuan heroin ti an tam vangin rukruk a hluar niin an sawi.

END-in an chhinchhiah chinah kum 1995 atanga 2018 thlengin Mizoramah kum khat chhunga heroin man zat chu kg 10 a tling ngai lo a, hetihlai hian kum 2019 atanga kumin thlengin kg 10 aia tam man ziah a la ni.

Kum 2019-ah kg 12.59 man niin, 2020-ah kg. 11.71, 2021-ah kg. 18.90 leh kumin  September thlengin kg. 19.97 man a ni tawh.

November 24, 2022 thlengin Mizoramah ruihhlo (heroin) hman sual vanga thi mi 39 an awm tawh a, chung zinga mi 36-te chu mipa an ni a, mi dang pathum chu hmeichhia an ni.

END chhinchhiah danin kum 1984 atanga kumin thlengin ruihhlo hman sual vanga thi mi 1,732 an awm tawh a, chung zinga mi 1,528-te chu mipa an ni a, mi dang 204-te chu hmeichhia an ni.

Mizoram police hotute chuan rukruk thubuai an chhuinaah pawikhawihtu an mante chu heroin ti an ni tlangpui tih an sawi a, a ti an tam vangin rukruk a hluar nia an hriat thu an sawi.

Rukruk venna atan mipuite mahni in leh hmuna CCTV vuah uar turin an chah a, rukru tam ber chu damdawi hman sual avanga harsatna nei, hmanhmawh taka sum mamawhte an nih tlangpui thu an sawi.