Aizawl July 2, 2023 : Tun hnai chhoah Excise & Narcotics department leh police-ten heroin an man tam hle a, heti tak maia heroin an man tam chhan hi Manipur buai vanga drugs kalkawng pakhat a pin vangin Mizoram lamah an kalpui vang nia rin a ni a. Kumin chhung hian ruihhlo vanga thi mi 40 an awm tawh nia chhinchhiah a ni.

ZALEN-in END thawktute hnen atanga thu a dawn danin tun hnaia heroin an man tam chhan tak chu hre chiah lo mah se a kalkawng ber pakhat, Manipur-ah tual chhung buaina a awm vang a ni thei tih sawiin Manipur lama kal thin chu Mizoram lamah an kalpui ta zawk nia an rin thu an sawi.

Ruihhlo kengtu an mante chu a neitu tak tak ni lovin inhlawhte an zawk tih sawiin, “Kan man ho hi ruihhlo neitu tak tak ni lovin a kengtua 3 leh 4-na te an ni a. Khawia kal tur nge tih pawh an hre lo a, a tlangpuiin phai lama tlang tur an ni a. A kentirtute hian phone hmangten an tih tur an hrilh a, tuten emaw lo lam turin an ti mai thin a ni,” an ti.

END thawktute chuan tunhma lama Manipur kaltlanga Jeribam atanga Mizorama lo lut thin heroin ang kha tunah chuan a awm tawh lo tih an sawi a. Ruihhlo kengtu-ah khawchhak mi an tam ber tih sawiin, “A tlangpuiin Myanmar-a Khawmawi, Falam leh Tahan an tam a. Mizoram mi leh sa pawh pawisa duh vanga ruihhlo kenga inhlawh an tam bakah hnam dang (vai) kan tih mai pawh an awm nual a ni,” an ti a. Mizo thalai zingah pawh ruihhlo ti thar an awm nual tih sawiin ruihhlo mamawhna (demand) pawh a sang ve hle niin an sawi bawk.

END thawktute chuan tun hnai hun eng emaw atang khan Tripura-a Sepahijala atangin ganja a lut nasa hle tih an sawi bawk a. “Tunhma ganja kan mante kha chu polythene-ah an dah mai mai thin a. Mahse, tun hnaia Tripura atanga lo lut erawh uluk taka beng muk a ni,” tiin thalai la naupang deuh zingah ganja zu an tam hle nia an hriat thu an sawi bawk.

END chhinchhiah danin kuminah damdawi hman sual vanga thi mi 40 an awm tawh a, hengte hi mipa 33 leh hmeichhia pasraih niin an vai hian heroin leh a kaihhnawih ti an ni.

END chhinchhiah danin ruihhlo vanga thi hi Mizoramah mi 1,776 an awm tawh a, an zinga 1,564 chu mipa niin hmeichhia 212 an awm tawh bawk.