- LV. Rokhawlkima Lal Isua Krista chu Kraws-a khenbeh a nih hnuah a ruang thlanah zalh a ni a, nithum niah a tho leh ta! Lal Isua Krista kha thihna hnehin tho leh ta lo chu ni se, keini ringtute tan chuan kan ring thlawn mai a ni dawn si! Mahse, a thawh leh miau avangin chatuan nunna nei thei dinhmunah min dintir a, “Pathianin khawval a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan” tia, Johana 3:16 a kan hmuh angin, Lal Isua Krista chu min chhandamtu, kan tan thihna hneha tholeh a ni tih hria a, amah chu kan rin angai a ni. Vawiin hi Kristianten Lal Isua Krista thihna hnehna a thawhlehna ni champha kan hman thin a lo ni leh ta reng mai. Ringtute tan chuan he ni hi a va hlu em! Chutih rual chuan he ni aimahin, he ni kan hman theihna chhan kan tan a tuarna, Kraws-a khenbeh hial nia a nun a hlan mai piah lamah, kan rinna tih famkim a nih theihna tura thihna hneha a thawhleh hlutzia hi kan ngaihtuah ngai em? Chatuan hremhmuna kal mai tur, Chatuan nun kan neih theihna hi a hlu a ni tih kan hriat thar a pawimawh takzet. Easter Sunday/Resurrection Day: Lal Isua Krista thawhlehna ni champha hlutna leh pawimawhna lam chu sawiin ziak vek lo mah ila, a hretu vek kan ni a, chuvang chuan Easter Sunday chungchang tlemte han tarlang ila. Lal Isua Krista thihna hneha a thawhlehna ni champha @Easter Sunday tia kan sawi thin hi, ramdang leh kohhran thenkhatah chuan sawiselna a awm thin. Hei hi a chhan chu, Easter tih hi ring lo miten an Pathiannu chawimawina ni sawina at^n an lo hman thin v^ng nia sawi a ni. (Helam hi chu ziak thui lo ila) Hei v^ng hian kohhran tam tak chuan, Easter Sunday ti lovin ‘Resurrection Day’ (Thawhlehna ni) tih tein an lam zawk thin a ni. A hman hun leh an chhut dan: Kum tinin Easter Sunday kan hman hun hi a danglam thin a, a changin March thlaah kan hmang a, a changin April thlaah kan hmang thin. Niin kan awmna lei equator zawn lai tak a paltlang hun ‘Equinox’ a thlen hnu atanga thla bial hun hmasa ber zawha Pathianni hmasa berah hman thin a ni. Chutiang atanga chhutin a hnuaia table tarlan ang hian Astronomical Easter hi Astronomical full moon zawh chiaha Pathianni hmasa ber a ni a, he hunah hian Easter Sunday hi hman thin a ni ta a ni. Kan hriat zau nan hrim hrim a hnuaia table tarlanah hian kumin 2014 atanga 2021 thleng tarlan a ni a, kum dawt chiaha table-ah hian ‘Spring Full Moon’ awmin hei hi nipui laia thla bial hun a ni. A dawt chiaha ‘Astronomical Easter’ chu a chunga kan sawi tak ang, ‘Astronomical full moon zawh chiaha Pathianni hmasa ber’ a ni. ‘Gregorian Easter’ erawh hi chu ‘Astronomical Easter’ nen thuhmun rengin, tun lai Calendar kan hman mil hi a ni. ‘Julian Easter’ erawh hi chu Kaisara hunlai thil, Julius Kaisara Calendar siam niin, kumkhatah ni 365½ a awm ve thung a, hei vang hian ‘Astronomical Easter’ leh ‘Gregorian Easter’ te nen Easter hun hi inan chang awm mah se, a danglam leh thin a ni. Kristian culture ang lekah: Kan ramah chuan a la ni lo deuh pawh a ni thei, hetih lai hian khawvel ram dang thenkhatah chuan Easter Sunday te hi Kristian Culture pakhat ang lekah ngaihna a awm ta em ni a tih theih. Easter Sunday a lo thlen dawn avangin sumdawng thenkhatin an thilzawrh hralh nuam an tih viau a, Lal Isua Krista kan tan thihna hneha a thawhlehna hlutzia leh pawimawhna lam aimaha, Easter Cake leh Easter Egg (Artui) an tuipui zawk a nih chuan an thlarau nun a ngaihtuahawm hle ang. Keini pawhin, Easter Sunday kan hman chhan lam aimaha Easter Cake leh Easter Egg tih vel kan tuipui a, kan ngai pawimawh chho zel a nih chuan kan inenfiah a va pawimawh dawn em! Easter Cake leh Easter Egg hi Lal Isua Krista thawhlehna lawmna at^n kan hmangin kan lo ngaihlu viau pawh a ni thei. Amaherawhchu, Lal Isua Krista kan t^n thisen chhuak khawp hiala a tawrhna leh a thihna te, kan rinna tihfamkim anih theihna tura a thawhlehna te hian inlaichinna reng reng a nei lo tih kan hriat a tha. Kan Kristianna tidal theitu leh Kristian culture pakhat angleka min ngaih tirtu a la ni thei ang tih a hlauhawm a, chuvang chuan Easter Cake leh Easter Egg tel lo pawhin Lal Isua Krista thawhlehna hi kan lawmin, amah kan fak thei a ni tih i hre thar theuh ang u. Thawhlehna rah: Lal Isua Krista kan tan thi a, a thawhlehna hian rahchhuah tam tak a nei a, kan sawi vek seng lo vang. A tlangpui pathum emaw lek chauh han tarlang ila. Pakhatnaah chuan Lal Isua thawhlehna chuan amah ringtute huaisenna a pe a ni. Lal Isua zirtirte zinga pakhat, Isua an man laia tlansana lo biru, ar khuan hmaa vawi 3 lai mai phatsantu Petera pawh khan, Lal Isua thawhleh hnuah chuan huai takin thu a lo hril ngam ta a nih kha. Pahnihnaah chuan Lal Isua Krista thawhlehna chuan amah ringtute thlamuanna a pe a ni. Lal Isua a thawhleh hnu khan Mari Magdalini hnenah a inlar hmasa ber a, Mari Magdalini chuan, zirtir dangte hrilhin, beidawng taka awm tawh zirtirte chuan beiseina thar nei lehin, thlamuanna nei tawh lote chuan thlanmuanna he khawvelin a pek ang ni lo, thlamuanna famkim chu an lo nei leh ta ang khan, keini pawh he khawval thilte avanga beidawngin, kan lungngai a, thlamuantu nei lo lo leh Pathian pawh a awm ta lo em ni tia ngaih chang kan nei fo thin. Amaherawhchu, hetih lai hian Lal Isua Krista chu kan thlamuanna a ni tih kan hriat reng a pawimawh. Lal Isuan amah sawmtu leh pantu a hnar ngai lova thlamuanna a pe zawk thin a ni. Pathumnaah chuan Lal Isua Krista thawhlehna chuan amah ringtute Chatuan nunna a pe a ni. Ringtute tana kaisanna (Promotion) sang ber chu Thihna hi a ni a, chu thihna piah lamah chuan Chatuan nunna a awm a, chuvang chuan he khawvelah thi turin kan lo piang a, nung turin kan thi leh dawn. Kan rin Lal Isua Krista ngei chu thihna hnehin a tholeh a, chutiang bawkin amah ringtute pawh thihna hnehin kan tholeh dawn a, chutih hunah chuan chatuana nunna kan chang tawh zawk dawn a ni. A va ropui em! Hetah a awm tawh lo ve, a tho leh ta: Tirhkoh Paula’n Korinth khua mite hnena a lehkhathawnah chuan, Lal Isua Krista chu thihna hnehin a tholeh a, chuvang chuan huai takin a thu a hril ngam a ni tih chiang takin kan hmu a, “Tin, Krista kha kaihthawhin a awm loh chuan kan thu hrilh hi engmah lo a ni ang a, in rin pawh engmah lo a ni bawk ang.” tiin I Kor. 15:14-ah a sawi anih kha. Awle, famkim lo takin kan chip lawr dun dun a, ziak thuina hmun lah a awm si lo. Engapawh nise, ‘Easter Sunday’ hi a hming emaw an lam dan emaw, a hman hun emaw aimah chuan kan hman chhan hi a pawimawh ber a, kan sawi lan tak ang khan kan tana thi, kan rinna tih famkimna atan tholeh, Lal Isua Krista kan nei hi ringtute tan chuan hlima lawmna tham a ni. Chuvang chuan Isua Krista thawhlehna ni champha kan lo thleng leh ta hi, amah ringtute chu hlima Lalpa fak tur kan nihzia a thara kan hriatna ni lo ni se, Lalpa fakin hlimtaka zaia lamin, kutbeng te’n amah chu i chawimawi theuh ang u. “Hetah a awm tawh lo ve, a tho leh ta” - Luka 24: 6