Kum 2013 MLA inthlanpui vote thlak hma deuh khan India rama inthlan buaipuitu lian ber, Election Commission of India (ECI)-a a hotupa ber, Chief Election Commissioner VS Sampath chu Mizoramah lo zinin, Aizawla thuthar lakhawmtute a kawmnaah, Tripura Transit Camp-a Bru/Tuikuk te chu an awmna hmunah vote thlaktir tura ruahman a nih thu leh, hei hi High Court thuchhuak a nih thu a sawi a. Khawi lai High Court nge tih erawh chu a sawi lang lo a ni awm e. Inthlan vote thlak a ni a, pawl thenkhat ten an dodal chungin Bru/Tuikuk te chu postal ballot hmangin Tripura Transit Camp-ah chuan vote thlaktir an ni ta tho a. Pawl thenkhat chuan, MP inthlanah chuan Tripura-ah vote thlaktir an nih tawh lohna turin a theih ang angin hma an la a, sorkarah pawh vawi duai lo NGO te chuan Tripura-a Bru/Tuikuk te vote thlaktir chu an duh lovin an dodal a. ECI chuan Lok Sabha MP thlanna, April ni 9-a lo awm turah Tripura-a Bru/Tuikuk awm mekte chu vote thlaktir lehin, vote tla te pawh Kanchanpur-ah chhiar turin a ruahman leh ta a ni. Election Commission of India hian Tripura-a Bru/Tuikuk, Mizoram Electoral Roll-a chuangte chu an awmna (Tripura)-ah vote thlaktir an nihna tura a tanchhan, High Court thuchhuak a tih hi vawiin thlengin Mizoram NGO te chuan an la zawng hmu ta chuang lova, ECI lah chuan Mizo mipuite engmah hrilhfiah chuang lovin, lal tak leh thunei takin ruahmanna chu a siam mawlh mawlh mai a ni ber a. Hei hi Mizoram leh hnam tana thawktu inti NGO hruaitute tan chuan ngawihbopui a harsa an ti a, Mizorama kir duh lo Bru/Tuikuk, Tripura Transit Camp-a awm mekte vote thlaktir tura thuneihna hi Election Commission of India hian a nei a nih chuan, NGO te hmalakna hian awmzia a nei thui dawn lo ni te pawhin a lang. ECI hi India ram Danpui behchhana din (Constitutional Body) a ni a, inthlan nikhuaa Observer atana a tirhchhuah zinga thenkhat chuan lal an hrawt emaw tih mai turin, inti thunei takin, official tenau zawkte mit tikham khawpin an awm fo tih sawi a awm thin nghe nghe. Constitution/Danpui hnuaiah hian mitin ten dikna chanvo an nei vek a, chu chu zahsak tur a ni. Mizoram atanga tlanchhia inti, Tripura-a awm mekte pawhin dikna chanvo an nei tho a, mahse, Mizoram khua leh tui dik tak te lakkir chu tute mahin an dodal loh laia, kir duh lova kum sawm tel tehmeuh awma, an awmna hmuna vote thlaktir an ni hian Mizo mipuite thin a khei a, ECI hian Mizo mipuite lungawilohna hi engahmah a ngai lo a ni thei ang em? ECI hian Mizo mipuite thu leh hla ngaipawimawh lo a, a bengkhawn lo lui zel a nih chuan Mizo mipui leh Bru/Tuikukte inkarah hian inhmelmakna tha lo tak a thlen thei dawn tih a hriat a tul khawp mai. Hei hi Mizoram sorkar pawhin chiang fek tawka Election Commission of India leh Central sorkar pawh a hriattir a tul ta niin lang. Mizo mipuiten Bru raltlan inti, Mizoram mi dik tak te Mizorama lakkir leh an dodal loh laia, Mizo mipui rilru tina zual zawng zela thil a tih chhunzawm chuan, Bru mipuite tan pawh Mizorama chen zui zel nuam lo khawpa inmu leh arna a thleng palh thei a, chutiang chu a thleng palh a nih chuan ECI mawhphurhna a ni tih hi Mizo mipui tam ber pawm dan a ni reng tawh dawn a. Karleh maia NGO Coordination Committee ten darkar 72 chhung awh Total Bandh an huaihawt tur pawh hi ECI hmalakna hrinchhuahah puh loh theih a ni lo ang. Chuvangin, Bru raltlan intite tana Mizoram pawn daih atanga vote thlaktir tura High Court tanchhan hi ECI hian a phawrh chhuah a hun ta khawp mai.