Nimin kha World AIDS Day a ni a, khawvel pum huapa hman anih avangin kan ramah pawh hman a ni a. Thalaite chu HIV chungchanga an dinhmun fuih niin ‘I dinhmun hrechiang rawh’ tiin thupui thlan a ni a, HIV thisen endikna nen inchhawp nghal a ni bawk a ni.   HIV/AIDS a kan dinhmun hi mithiamte sawi dan chuan India ramah a sang ber kan ni mek a, za zela pahnih (2.04%) aia tam tunah hian Mizoram chuan a vei a kawl mek a, pun lam a pan zel bawk a ni. India ram pum ‘national average’ 0.22% nena khaikhin phei chuan kan sang filawr hle a ni. Tan lak a ngaihzia chu a lang thei mai awm e.   Natna hrim hrim hi enfiah tir vata a nat dan hriat chhuah theih a nih chuan enkawl hma a tha ber a, natna finfiah hleih theih loh hi hnathawk te tan pawh enkawl a har ta thin a ni. Hetiang tho hian HIV pawh hi thisen entir vata a hrik hmuh vat a nih chuan enkawl a ziaawm phah thin a ni.   Tunlaiah phei chuan thiamna a sang tawh a HIV/AIDS enkawl danah hian thil thar hmuhchhuah reng a ni a, kum tlemte chhung pawhin hmasawnna hmuh tur a awm dawrh thei ti tih zel tawh a. Ram hnufual ni mah ila khawvelin a ngaih pawimawh a nih avangin kan ramah pawh enkawlna tha zawkin min luhchilh zel a ni. Hmasawnna vang hian he natna hri paite pawh rei tak an dam thei tawh a, chhungkaw pangngai dinin nu naute nena khawsate pawh kan nei nual tawh a ni. Hriatlohna hian hlauhna a thlen thin a, he natna hi hriat tum ila, a vei tan pawh in enkawl hma a pawimawh ber a ni tih hriat a tha ang.   HIV a darh chakna ber chu mipat hmeichhiatna hman atangin a ni a, insum theih a tha bera a thei lote tan pawh condom hmang turin infuih thin a ni a a la darh chak hle tih hriatin hemi kawngah hian tanlak a la ngai a, ngaihdan zau zawk kan neih thiam a hun tawh hle mai.   A hrik pai tih inhre lem lote hi a pu darh theitu zinga chhiar tel a nih avangin mahni dinhmun hriat chiana a lo positive palh ta a nih pawhin a darh zel tur ven kawngah pawh fimkhur nan a hman hlauh theih dawn a. He ni bik denchhen lo pawh hian thisen test tir hi uar zel ni se, hun remchang pawh siam tam ni se a that a rin awm hle mai.