Aizawl September 1, 2024 : Federation of Mizoram Samagra Siksha Employee (FEMSE) chuan thla thum hlawh an lak tawh loh avangin Teachers Day-ah badge dum bel an tum.

FEMSE hruaitute hnen atanga ZALEN thudawn danin sawrkar laipuiin March thla tawpa thla thum hlawh, Rs. nuai 733.10 a rawn sanction chu Treasury-in a hreng khaw tlai a, hetia hren khaw tlai a nih avang hian central atanga sum lokal tur chu nasa taka tihkhawtlai a ni.

FEMSE Council chuan an dinhmun ngun taka a ngaihtuah hnuah, Teachers’ Day 2024 lo thleng tur hi hreh tak chungin badge dum bel chunga hman nise tiin a rel ta niin an sawi.

FEMSE chuan sawrkar hotute chu an dinhmun hriatsak a, an harsatnate a rang thei ang bera ngaihtuahsak turin an ngen bawk.