A hliam scan neih a nih hnuah Manchester United tan, tun season-ah Paul Pogba chu a inlan theih a rinawm tawh loh thu an coach lailawk Ralf Rangnick-a'n a sawi. Tun nipuia contract zo tawh mai tur France midfielder Pogba, kum 29 hi thawhlehni zan Liverpool laka 4-0 zeta an tlawm tum khan a chawn bawrah hliam a neih vangin minute 10 hnu lekah lak chhuah a ni a, alo berah kar li tal a chawlh a ngai dawn. 
   

Hetia a hliam tak siah chuan United game hnuhnung ber May ni 22 a Crystal Palace an tum hunah pawh Pogba hi a inlan theih a beiseiawm dawn ta lo. "A hliam dan en chuan tun season-ah chuan a khelh theih a rinawm tawh lo," tiin Rangnick chuan a sawi.
   

Pogba hi club game hnuhnung ber tal a khelh theih i ring em tia zawhna chu, German coach chuan, "Kan game khelh hnuhnun ber tur hi May thla tawp lam a ni a, doctor min hrilh danin alo berah kar li chhung tal a chawlh a ngai dawn a ti si a, a khelh hman pawh ka ring lo," a ti. 
   

Pogba hi 2012-a Juventus a zawm hma khan United academy lamah a awm thin a, 2016 khan kha tih laia world-record fee £89m zetin Old Trafford lamin an la let leh a ni. A club hlui lama a let leh hnu hian 2018 World Cup winner hian United tan kum ruk chhungin match 226 khelhah goal 39 a thun tawh a, 2017 khan Community Shield, League Cup leh Europa League a chawipui bawk.
   

United hian Premier League game nga chauh an hmabak tawh a, Pogba hi a inlan hman tawh loh hmel. Tun season zawh rual hian Pogba hian United hi a chhuahsan rin a ni bawk.