-Dikteii Hnamte

A la awm tih hre mah ila a hma anga fimkhur ka peih tawh loh leh Covid19 hlauhna ka namnul vel deuh mai mai lai, 11/11/2022  zanah khan ka khua a sik hluah mai a. Dengue chu ka hlauh ber a niin a tuk chhunah thisen test tirin dengue a lo hmuh loh takah chuan ka thaw huai a. Mahse Trinity Hospital lama thil dang entir tura kan kal chuan covid19 ka lo positive reng tih an hmuchhuak tlat mai! 

Pathian khawngaihnain a hmaa ka kai tuma ka chauh ang em em kha a ni tawh lo hlauh a, khawsik pawh ka nei lo zui deuh mai!

Ka positive tih kan hriat hnu ni 2 ah chuan ka fanuin min rawn phone a. Ka chanchin ka hrilh a, ka that viau thu leh chaw erawh ka ei theih loh thu ka lo hrilh a. Ka fanu chuan, “A va lawmawm ve, i dulkiar a reh sawt dawn anih chu” a ti ta daih a. Min chhanna hi mak ka ti viau dawn a, mahse a hlimawm zawnga thil thlir thiam a pawimawh zia min zirtir thar hle thung.

Kum engemawzat kal tawhah khan kan thiannu pakhat, a pasal zu in mi, engemaw tihsual palh changa kut a tawrh thin thu leh hmai duk chur chunga a hnua an lam dun leh chungchangte sawiin amah chu a nui nasa ber berah a tang a. A thusawi zawhah chuan “Ka thin hi a rim ve thin lutuk a, mahse a thatna deuh pakhat a awm asin” a tih chuan kan meng hra hlawm a. “Ka rilru a nat hian chaw ka ei thei lova, ka thau lutuk tur a tiziaawm a, a chi phian” a’n ti chu kan nuihpui nasa teh e. A hun tawn thin harsat zia hre ve tu kan ni a, rilru naa indawmkun ngawih ngawih ni ta sela kan dem miah lovang. Mahse ani chuan a harsatna leh a rilru natna chu hnuala, chauh puia beh rawk rawkna atan a hmang duh hauh lova, a thatna lai (tlemte pawh ni se) a hmu thiam tlat mai khan nu awhawm anih tir a, thinlung tap chunga a hlimawm lai hmu thei anihna khan amah pawh chakna nasa tak a pe niin ka hria.

Mi tamtak chuan kan duhdana thil a thlen loh te, kan beisei anga mi an awm loh te, kan tum anga kan awm theih loh te hian khawvel a tawp ta mai emaw tiin kan buai thin. Chu chuan hmalam pan ai chuan hnung lamah min pawt let a, kan nih tur ang kan nih loh phah fo thin.

Mi hlim nia kan hriat leh hlim thei tia kan sawi thinte hi an kawng a mam purh bik lova, harsatna an tawk ngai ve lo pawh a ni kher lo. Mihring tungchhova piangte hi khawvela awm kan nih miau avang hian kan hmaah harsatna leh buaina a awmin chauh chang leh zuaia nguai chang nei kan ni vek ti ila a sual tam awm love.

Hlimna hi khawilai emaw a awm, tute tan emawa dah bik leh harsa taka zawna neih theih chauh emaw kan tih chhung chuan kan nunah hian hlim ni kan hmu tlem viau dawn a lo ni. Tute ta emaw, tute emaw chauh neih tura kan dah vang hian kan nei ve thei lo mai a lo ni zawk asin.

Engatinge i hlim loh?
    Engatinge i ngui? I harsatna tawh khan a chenchilh reng dawn che nia hriain hrehawm i ti a, i hlim thei lo em ni? Mi neih ang i neih loh vangin em ni i lungawi loh?

Kan nun kaihruaitu hi kan ngaihtuahna hi a ni ber a. A chang phei chuan kan ngaihtuahna hi thil ni tak chiah lo, nia kan ngaih ngheh em emin tibuaiin tul lovah kan hah fo mai! Suangtuahna kan kawm a, thil nihna chiah hre chiang lo mah ila kan rin dan hmangin kan lo hah lawkin kan lo chau hmasa thin. 

Hmanni lawk khan engemaw kan buatsaih turah banner tar ngai kan nei a. Kan tarna hmun tur la peih fel loh leh kan banner la thlen hma chuan kan thiannu pakhat chuan, “Awi, banner hi kan pawh mar viau loh chuan a mawi dawn si lova, banner chuar hian mit a tikham si” tiin a inngaihtuah hah nasa mai a. Kei chuan “Ngawi teh, banner chu lo thleng sela, kan tarna tur han peihfel sela, kan tar hunah a mar thei ang berin kan tar ang a, a mar thei lo anih chuan kan buai chauh dawn nia. Tun atanga i rilru a lo hah chuan a hahthlak dawn lutuk” ka ti a, kan nui dun vak vak a. Hetiang deuhva thil tak tak thlen hma hauhva a tha aia tha lo zawk suangtuaha lo hah hi thil awm thei, rinaia nasaa min chenchilh tu a ni awm asin!

Mihring tumah famkim kan awm loh lai hian fel/tha famkim beiseina erawh mitin hian kan nei niin a lang a. He famkim beiseina hian nasa takin kan ngaihtuahna tibuaiin a tichau va. Mahni lam atanga tih tur hahchawlh sana midang tih tur erawh chhut kauh kauh thin mihringte hian kan ngaihtuahna hi keimahni kuta awm anih hi inhrilh nawn fo a pawimawh hle.

Hlim tum tlat chuan a chan a chhiat poh leh a aia chhia awm tawh lo na na na chu hmalamah tha zawk a awm ang tih beiseiin hlimna a ngaihtuah lui thei thin.

Neih loh avanga hlim loh aiin kan neih hlimpui tum ila. Na kan neih avanga chau mai lovin kan la dam ve avanga rilru paukhauh put tum ila. Kan hun tawn rilru tina ngawih ngawihtu pawh hunin a la liampui dawn tih ring tlat ila. Kristian, Isua chhandam te phei hi chuan a tawpkhawk, thihna kut vawtin min kaih hunah pawh chatuan nunna, lungngaih reng reng awm tawh lohna hmunah lehnghal kan nei tawh dawn tih hriain mahni ngaihtuahna theuh thununin hlim i thlang ang u