Aizawl: Mizo Kristiante hunpui, Isua Krista pian ni champha, Krismas lawm nan vawiin khan hmun hrang hrangah hlim takin ruai theh a ni a. Mizoram Larsap Dr. Hari Babu Kambhampati chuan ruai hi Zarkawt kohhranah a theh a ni.

Krismas lawmna ruai hi nimin lam khan kohhran thenkhat chuan theh bawk mah se a nawlpui chuan vawiin khan an theh a. Zing atanga hnatlangin kohhran mipui ten mahni phak ang tawk tawkin chaw leh sa an buaipui a, zing atanga hnatlanga thawkchhuak an thahnem hle.

Krismas lawmna ruai atan hian bawng, vawk, ar leh sangha bakah thlai chi hrang hrangte siam a ni a. Kohhran mipuiten biak in lamah ruai thehin damlo leh harsatna neite erawh in lamah an ei tur laksak an ni thung.