ZALEN September 28, 2026: Hlimen Local Council & All NGO ten Ni 01.09.2026 atanga Lalsavunga Park danna kan kalpui mek chu an la dan chhunzawm zel a, he park rawn tlawh tum hi nitin mi 50 atanga mi 100 chuang an la awm ve reng a, heng zingah hian a chanve aia tam mah hi State pawn atanga mikhual lo kal te an ni thin an ti.

Hlimen Local Council & All NGO te chuan khualzin lo kal te hi Park enkawl mumal loh avanga haw tir leh ngaia an awm thin chu pawi an ti a. Mizoram chhung leh pawn atanga he lai park rawn kal tum tam tak park enkawl mumal loh leh thianghlim loh avanga hnar kir ngaia hmalakna an neih a ngai ta chu ram leh hnam ang pawhin a mualpho thlak in pawi an tih thu thuchhuah an siamah an tarlang. "Tun dinhmun ah hian Lalsavunga Park enkawltu contractor hi cancel a nih hma loh chuan park hi tlawh theih a ni dawn rih lo a ni tih mipuite kan in hriattir nawn leh bawk a ni," an ti. 

Hlimen Local Council & All NGO te chuan, "Hetiang hi kan dinhmun a nih avangin Lalsavunga Park enkawltu Contractor hian Park enkawlna kawngah sawrkar nen an inremna tamtak a bawhchhiat avangin a rang thei ang berin he inremna atang hian inhnawkdawk turin kan ngen a, sawrkar lam pawhin agreement dan zawm lo contractor hi a rang lama min cancel sak turin kan ngen nawn leh bawk a ni. 

Heng kan ngenna te hian awmzia a neih theih dawn loh chuan thla thar ni 03.10.2026 atang hi chuan Hlimen khawtlang chuan Lalsavunga Park chungchangah hian tha kan tih danin hma kan la chhunzawm ve tawh dawn a ni," an ti.