Aizawl: MPCC Media department chuan Home Minister hlui, R.Lalzirliana leh NECS Chairman thin, Robert Romawia Royte te chu  dik lo taka thil kalpuiah an puh. Nimin khan Aizawl Press Club-ah chanchinbumite kawmin MPCC Media Department Chairman Lallianchhunga chuan Human Resource Development Ministry hnuaia sakhaw tenau behchhana zirna inten tanpuina an dawn theihna Infrastructure Development for Minority Institute hmangin Aizawl FC Football Academy-in dik lo takin sum an dawng nia sawiin, Kristian sakhaw hming behchhana hetianga dik lo taka sum lak a ni hi MPCC chu pawi a ti hle tih a sawi. Lallianchhunga chuan hemi chungchang an chhui chianna ah Mizorama Minority School anga tarlan 57 chuan 1st Instalment an dawng tawh nia sawiin, 2nd Instalment chu an hnathawh dan tarlanna  kimchang thehluh a ngaih avangin hrensak an ni tih a sawi a. Minority School grant hi hmuh a nih theih nan Home department hmalaknain NECS chu Project siam tir an ni a, Central sawrkarin 2nd Instalment a pekchhuah duh loh nachhan nia tarlan chu  Mizoram Home Department-in pawisa hman dan kimchang tarlanna a thehluh loh vang niin a sawi. MPCC Media Department Chairman chuan tanpuina dawngtu zinga mi Aizawl Football Club Academy chu cheng nuai 17.71 dawng tura tih niin, kum 2015 khan 1st Instalment cheng nuai 6.64 an dawng a, hei hi Dawrpui veng chhungah hmuh tur a awm lo nia sawiin, School Education Department pawhin Aizawl FC Acdemy hi an Department record-ah an hmu zo lo hrim hrim a, school tin tana UDISE Code an pek zingah pawh a tel lo niin a sawi. Lallianchhunga chuan Home Department-in hetiang hi an kalpui a ni tih School Education Department-in a hriat chuan thui tak kalpui a lo ni tawh niin a sawi a. He thil hi Home Minister hlui R.Lalzirliana’n Chief Minister charge a lak laia thleng nia sawiin thil dik lo hi a tawp thlengin umzui an tum tih a sawi bawk.