Aizawl: Nimin khan Union Home and Cooperation Minister Amit Shah a kaihhruaiin India hmarchhak state Chief Minister ten NESAC space technology chu hmasawnna atana tangkai zawka an hman theih dan tur an sawiho.        

North Eastern Space Applications Centre (NESAC) Multipurpose Convention Centre Shillong, Meghalaya-ah Home Minister ho hian NESAC Society Meeting hi an thukhawm a, DoNER Minister Gangapuram Kishan Reddy leh Union Minister of State Jitendra Singh te pawh a tel a ni.

NESAC Society Meeting-ah hian Chief Minister Zoramthanga pawh a tel a; Mizoram State in hma a lo lak tawhna te sawiin, hmasawnna ki hrang hrang atana ruahmanna thar siam te a tarlang bawk. Chief Minister chuan agriculture leh allied department tihhmasawn leh tourism tihchangtlun kawngah te, ruahtui khawl leh tuihna dinthar chungchanga hmalakna thar tha tak tak awm thei te a sawi a. Mizoramah chuan MIRSAC hmalakna hnuaia space technology chu hmalakna hrang hrang ah hman tangkai a nih thu sawiin, huapzau zawk leh tangkai zawka space technology hi hman tangkai a nih theih nan state-in heng atana project a thehluh te chu ngaih pawimawh sak ngei a tul thu a sawi a. North East Spatial Data Repository (NESDR) portal-ah Mizoram data thehluh fel a nih thu leh NESAC in NEC-Project geo-tag tura list a siam te pawh geo-tag zawh fel vek a nih thu leh hmalak tawhna dangte a report bawk.

Meeting zawh hian Union Home Minister  Amit Shah hian NESAC Multipurpose Convention Centre-cum-Exhibition Centre atan lungphum a phum bawk a ni. NESAC hi society pakhat, Department of Space (DOS) leh North Eastern Council (NEC) thawhdunna rah a ni. Kum 20 chuang hmarchhak state pariat te hman tangkai turin space science leh technology lamah hma a la a. Operational remote sensing leh geographic information system hmanga leilung hausakna a tangkai thei ang bera hman te, hmasawnna ruhrel ruahman leh din kawngah te, zirna, healthcare, chhiatrupna laka invenhimna leh thildang atana operational satellite communication applications service pek te, zirchianna (research), etc. atan hma an la thin a ni.

Mizoram Chief Minister hi Chief Secretary Lalnunmawia Chuaungo leh sawrkar mi pawimawh ten an tawiawm a ni. ZALEN thudawn danin nimin tlai dar 5:30 khan Home Minister Amit Shah ho hian Shillong ah hmarchhak bial Chief Minister te chuan meeting an nei zui a, hetah hian state ramri buai chungchang an sawiho leh a ni.