Aizawl: Conference of Ministers of North Eastern States for Promotion of Inland Waterways/Shipping related activities in North East Region chu August 27, 2021 khan Union Minister for Ports, Shipping and Waterways, Sarbananda Sonawal hovin Guwahati-a neih a ni a. Mizoram sawrkar aiawhin Transport Minister T.J Lalnuntluanga pawh a tel a ni. 

Conference ah hian hmarchhak biala inland water transport kalpui dan tur leh hei hian sumdawnna leh tourism a hmasawnna a thlen turte sawiho a ni. Transport Minister T.J.Lalnuntluanga chuan Khawthlangtuipui, Tuichawng, Tlawng leh Chhimtuipui (Darzo atanga Lomasu) te chu hman tangkai vat a nih theihna turin rawtna a thlen a.

Mizoram lui pawimawh dang pali Tuivai, Tuivawl, Serlui leh Tuirial te chu hman tangkai a  nih theih leh theih loh enfiah a survey neih hmasak turin a thlen bawk a ni.

Inland Water Transport hmasawnna tura Mizoram sawrkar hmalakna leh mamawh te tarlang bawk.

Sumdawnna kawngah leh tourism lama hmasawnna tura Mizorama lui liante hman tangkai a nih theih nan hmalakna tur pawimawh te a sawi a. 

Transport Minister T.J. Lalnuntluanga hi Esther Lalruatkimi, Commissioner, Commerce & Industries leh K.T. Beicho, Commissioner & Secretary, Transport Department ten an tawiawm a ni.