ZALEN, May 27, 2026: Mizoram criketer pali - Jehu Anderson, Jacinta Laltanpuii, Vanlalruatpuii leh Dorothy Ngurnunmawii te chu anmahni huang theuhvah India hmarchhakah a tha berah thlan an ni.

Hmarchhaka cricket tihhmasawnna nana state paruk intelkhawmna, North East Cricket Development Council (NECDC)-in kum tina an tih thin anga a season liam ta, 2025-26 chhunga Board of Control for Cricket in India (BCCI) tournament-a che thate lawmman a hlan thinah Mizoram criketer paliten hi lawmman hlan an ni.

Pathianni zana Imphal, Manipur-a NECDC 5th Achievers’ Nite-ah hian Jehu Anderson chu Best Wicket Keeper in Senior Men’s chawimawina hlan a ni a. Season liam ta chhungin Jehu-a hian Mizoram chu Syed Mustaq Ali T20 Trophy (Plate)-ah champion-puiin Elite a kaipui.

England thlenga lo inkhel tawh, Dawrpui Vengthar, Aizawl tlangval hi Ranji Trophy leh Vijay Hazare Trophy-ah pawh Mizoram teamtana thawh hlawk ber zinga mi a ni bawk.

CAM Awards 2026-a Women’s Cricketer of the Year atana thlan, Jacinta-i chu Best Batter in Women’s Under-23 atan thlan a ni a. Season liam ta khan a captain-na hnuaiah Women’s Under-23 One Day Trophy (Plate)-ah leh Under-19 T20 Trophy (Plate)-ah Mizoram chu nomawi lakpuiin Elite a kaipui ve ve.

Under-23 One Day Trophy (Plate)-ah hian New Chalrang nula, all rounder Jacinta-i hi vawi ruk khelhah run 290 siamin century leh half century vawi khat ve ve a vaw chhuak a, nomawi an lak theih nana thawh hlawk ber pakhat a ni.

CAM Awards 2026-a Junior Cricketer of the Year (Women) latu, Ruatpuii chu Best Batter in Women’s Under 19 lawmman hlan a ni ve bawk a. Jacinta-i ang bawkin Women’s Under-19 T20 Trophy (Plate) leh Women’s Under-23 One Day Trophy (Plate)-ah Mizoram player pawimawh a ni.

Tlangnuam Vengthar, Aizawl tleirawl hi inelna pahnihah hian Player of the Tournament-ah thlan a ni ve ve a. Lawmman a dawnna, Under-19 T20 Trophy (Plate) bikah hian run siam tam ber niin vawi ruk a khelhah half cetury vawi hnih nen a vaiin run 190 a siam a ni.

Mutthi naupang, Dorothy Ngurnunmawii chu Best Wicket Keeper in Women’s Under-15 chawimawina hlan a ni a. Women’s Under 15 One Day Trophy (Plate)-a Mizoram captain hian a kaihhruai team chu final a luhpui a, Tripura lakah hnehna a chanpui zo ta lo hlauh a ni.

Mi mal lawmman bakah hian a vawi khat nan CAM chuan huang chi thum - Senior Men’s, Women’s Under 23 leh Women’s Under 19-ah Best Team lawmman a dawng bawk.