Aizawl December 12, 2021 : School Education Minister Lalchhandam Ralte chuan Saipum Primary School- I kum 100 tlin (Centenary) lawmnaa  thu a sawi naah hmasawnna tura ke penna hrang hrangah a pawimawh ber chu Zirna hi a nih thu a sawi.

Zirtawpni-a khuallian a nih naah Lalchhandama Ralte chuan zirlai ten ztirtute atanga thiamna an hmuh leh an dawnte bakah thuawihna, taimakna, dawhtheihna, insumtheihna nen, Pathian tih chunga lehkha an zir phawt chuan hlawhtlinna an nei em em ang a ti. Social Media a lo chak tawh hle a, hemi kawngah hian zirlai ten a tawk an hriat a, zirna tibahlah zawnga an khawih nasat chuan zirnaah hlawhtling loh a hlauhawm a, chuvang chuan zirna lama anmahni pui thei turin a tangkai zawngin hmang thiam turin a chah. 

Lalchhandama Ralte chuan zirlai nu leh pa te chu an fate school-a zirna bakah in lama tih tur homework te lo en zui pui a, theihtawpa an fa ten thiamna an neih theih nan che chhuak turin a chah a. Khawtlang hruaitute (NGOs) chu zirlaite zirna tibuai thei zawnga, programme buatsaih thin lo turin a chah bawk. 

School Education Minister chuan Saipum Primary School-1 kum 100 tling tawh school building tha lo leh hlui tak chu a hmun hma tha tak ruahman hunah a thara sak that a tum thu a sawi bawk.

Bialtu MLA Lalringsanga Ralte pawhin thusawiin hun chep tak kara Saipum Primary School-1 Kum 100 tlinna lawmna programme fel fai taka an buatsaih theih chu fakawm a tih thu leh a buatsaihtu organising Committee chungah lawmthu a sawi a. Lalrinsanga Ralte hian Govt. Primary school Centenary puala Souvenir an buatsaih chu a tlangzarh sak bawk. School Education Minister Lalchhandama Ralte chuan Saipum Primary School-1 te hi Football, Volleyball, Volleyball Net leh Water purifier a pe bawk.

Saipum Primary School-1 Centenary lawmnaah hian he school a lo lut tawh te, khawtlang hruaitute leh zirlai naupangte an tel tha hle a, tlaiah Centenary lawmna ruai an kil ho a ni.