Aizawl: Rajya Sabha MP K.Vanlalvena chuan Hmawngbuchhuah thleng rel kawng siam anih theih nan sawrkar laipui nawr a tum thu a sawi a. Hetih lai hian Bairabi atanga Sairang thleng rel kawng siam hna chu 58% zawh a ni tawhin zawh hun tura ruahman December 2023 ah chuan zawh hman ngei an tum tih thawktute chuan an sawi.

ZALEN zawhna chhangin Rajya Sabha MP K.Vanlalvena chuan karleh maia Parliament session loawm turah hun a awm theih chuan Mizorama rel kawng siam mek chungchang hi auchhuahpui ngei a tum tih a sawi a. "Bairabi atanga Sairang thleng pawh tur rel kawng min siamsak avanga lawmthu sawina te, kumin budget ah nuai 1000 min dah sak avang te'n lawmthu sawi ka tum a. Sairang atanga Hmawngbuchhuah thleng rel kawng zawnfel vek tawh pawh a rang thei ang bera chhunzawm turin sawrkar laipui nawr ka tum a ni," a ti bawk. 

Rel kawng chu mipuiin an chhawr tangkai dawn tih sawiin, "Kan economy chawikang thei tur a nih avangin mipui pawhin an nghakhlel a, chuvangin huntiam chhunga zo hman ngei turin thawktute pawh ka nawr a. Oil depot tha tak siam turin central hi nawr ka tum a ni," a ti a. Tuna rel kawng siam hna thawh mek chu tha thawkhata a hriat thu ZALEN a hrilh bawk. 

Bairabi-Sairang rel kawng siam hna thawktu Northeast Frontier Railway (NFR) Deputy Chief Engineer H.Meena chuan harsatna dang an tawk anih loh chuan huntiam chhunga zawh hman ngei an tum tih ZALEN a hrilh a. "Khua in a zir a, hmanraw lakluh kawngah harsatna a awm loh chuan December 2023 ah chuan he project hi zawh hman ngei kan tum a ni," a ti a. Hmanrua chu hmun hla tak tak atanga chawkluh anih avangin harsatna thenkhat an tawk tih sawiin Northeast Frontier Railway Engineer te chuan, "Mizoram lung hi a chan tawk loh avangin Jharkhand atangin kan chah lut a. Hmanraw dang te pawh Bengal atanga lakluh ngai te anih avangin hnathawh zung zung a harsa a, mahse huntiam chhung hi chuan zawh hman ngei kan tum a ni," an ti bawk.

Railway Consultant Hrangtawna pawhin Mizorama rel kawnglaih hna sawrkar laipuiin a ngai pawimawh chu lawmawm a tih thu a sawi a. Hmawngbuchhuah thleng rel kawng hi tlang thei se chuan zirlaite bakah bungraw lakluh leh thawnchhuah kawngah Mizoram in hlawkna nasa tak a nei thei dawn niin a sawi a. Rel kawng lian hi a tlang hun chuan bungraw phur, oil phur mai bakah rel chak chi hmangin India khawpui lian te chu kalpawh zung zung theih a ni tawh dawn niin a sawi bawk.

Bairabi leh Sairang inkarah hian Rel Station 4 – Hortoki, Kawnpui, Mualkhang leh Sairang a awm dawn a, rel kawng siam hna hi 2008 May thla khan tan a niin tun dinhmunah hnathawh tur tam zawk (58%) chu thawh zawh a ni tawh a. Rel kawng hi KM 51.38 a thui tur a niin lei dawh liantham (Major Bridge) 55, lei dawh tenau deuh (Minor Bridge) 87 leh leiverh (tunnel) Metre 12,672.25 a thui/sei a awm a ni.