June 4, 2023; Hmeichhiate zahawmna palzutsaktu a puh social media 'Khawlhring lalpa' tia inchhal, Zothanmawia (23), Chengpui, Lunglei District chu police ten an man.

Hmeichhiate zahawmna palzutsak hi, Cyber Space-ah pawh nise sual lian tak a ni. Lunglei District-a nula pakhat hnen aṭangin Facebook-ah mi pakhat, "Khawlhring Lalpa" tia indahin mipat hmeichhiatna hmanpui atan biak theih a nih thu caption-a hmangin facebook group hrang hrangah a thlalak a post darh sak tih thu complaint dawn a ni a. Cyber Crime PS (CCPS) Case No.15-23 dt.03.04.2023 U/S 509 IPC r/w 67 of IT Act, 2000 ziah luh nghal a ni. 

He case hi uluk tak leh ngawrh taka chhui a niin, electronic evidence awm ang angte zir chianga technical analysis neih a nih hnuah phone number rinhlelh pakhat chu chhui chhuah a ni a. Cyber hnuchhui thiamten theihtawp chhuaha bawhzui zela a tawpah chhuichhuakin 1.6.2023 khan CCPS team-te chu Chengpui khuaah kalin a mawhphurtu, Zothanmawia (23), Chengpui, Lunglei District chu an va man ta a ni. A mobile phone hman lai pawh uluk taka check sak niin he thil a post na account-ah hian a lo la in log-in nghe nghe a ni. Chhui chhunzawm mek zel a ni.

Cyber Crime tuartu i nih chuan Cyber Helpline Number 1930 ah biain emaw, www.cybercrime.gov.in ah ziakin complaint i thehlut thei reng a ni.