Aizawl April 22, 2024 : Hong Kong Centre for Safety Food te chuan India siam hmuihmer bawlhlo (spices) thenkhatah cancer thlen thei hlo chikhat ethylene oxide an hmu. International Agency for Research on Cancer (IARC) te chuan Ethylene oxide te hi 'Group 1 carcinogen'-ah an dah a ni. Singapore chuan Mizoram-ah pawh kan hman nasat, MDH leh Everest te kutchhuak bawllhlo siam lakluh an titawp lailawk tawh bawk tih TImes of India (TOI) chuan a tarlang.

TOI-in a tarlan danin Hong Kong Centre for Food Safety te chuan April 5 khan an official website-ah India atanga spice (hmuihmer bawlhlo) an lakluh pathum zingah ethylene oxide hi hmun a ni tih an tarlang. Ei in lama Hong Kong leh Singapore-a thuneitute chuan April kar hmasaber khan India atanga lut Spice te ei lo turin hriattirna an chhuah a ni.

Heng cancer natna thlen thei hlo hi Indian company lian pahnih MDH leh Everest kutchhuak spice chi thumah leh chi khatah hmuh a ni a, chemical hman phal baka tam a awm a ni an ti bawk. Amaherawhchu, company pahnih lam atangin hemi chungchang hi chhanna a la awm lo.

International Agency for Reserach on Cancer te chuan ethylene oxide hi 'Group 1 carcinogen' ah a dah a ni. Hong Kong food regulatory authority chuan MDH kutchhuak spice chi thum - Madras Curry Powder (spice blend for Madras Curry), Sambhar Masala (Mixed masala Powder), leh Curry Powder (Mixed masala Powder) bakah Everest kutchhuak Fish Curry Masala-ah te heng hlo chi khat ethylene oxide hi an hmu tih an sawi.