ZALEN, Dec. 03, 2024: Hmun danga la pho chhuah ngai loh lemziak leh lemtuk 97 pho chhuahna, Mizoram Art Development Society (MADS) buatsaih Annual Art Exhibition chu Thawhlehni khan Lianchhiari Rûn, Treasury Square-ah tan a ni a, Zirtawpni thleng a awh ang.

MADS hruaitute chuan kumin exhibition-a an thil pho chhuahte hi hmun danga vawi khat mah la pho chhuah ngai loh, vantlang hmuha vawi khat tihlanna vek a ni tih an sawi.

Lemziak pawla an general secretary, Lalrammawia chuan an thil pho chhuah ziaktute leh tuktute chu tute tan pawh an duh ang zawng ziah leh tuktir turin an biak theih reng tih a sawi.

Mizo zinga lemziak lama hriat hlawh ber pawl, Amawii Art Novelty neitu, Amawii chuan lemziak mite chuan Mizoramah ngaihhlut an la hlawh tawk lo nia a hriat thu a sawi a, ziak mi tam tak chu harsa tak tak chunga tui em vanga kal hram hram an ni hlawm tih a sawi.

Mi hausa leh neinung zawkte pawh he lama harh chhuak tura sawmin, “Kan lemziaktute hi sponsor nachang pawh hria se a lawmawm ngawt ang,” a ti.

MADS hi November, 6, 2012-a din kha niin member 106 (member puitling 99 leh associatiate member pasarih) an awm mek a, member ni tur hian a tui apiang, zir thiamna nei lo tan pawh a dil theih tih an hruaitute chuan an sawi.

Exhibition hi kum tin kum 2014 atang khan an huaihawt thin a. Kumin hi Information & Public Relations Department (IPR) nena an buatsaih a ni.

An nodal department, IPR Director C.Lalnunkima’n exhibition hi a hawng a, MADS leh I&PR deparment tangkawpin an buatsaih painting competition lawmman sem nghal a ni a, lawmman hian certificate, pawisa leh trophy a keng tel.

Exhibition-a lemziak leh tuk chhawp chhuah zinga man to ber chu Rs. nuai 2.5 man a ni a, a tlangpuiin Rs. 10,000 atanga 25,000 man bawr a ni.