April 15, 2025; Nimin Pathianni leh inrinni khan hmun hrang hrangah kangmei a chhuak a, mi pakhatin nunna a chan.

Nimin chawhma dar 10 vel khan Lunglei Luangmuala C. Malsawma te In chu bungrua engmah chuh hman lovin a kang a, thi leh hliam an awm lo.

In hi Inkhawm an kal hnu a kang niin, a kan chhan chiah hi hriat nilo mah se Eeectric wiring fel tawk lo avanga kang a nih rin a ni. C Malsawma te hi nupa rek a awm an ni a, an fapa te in hrang changin an khawsa tawh a ni. In kangah hian  an bungrua, Fridge, TV, Uite pahnih leh thawmhnaw zawng zawng a kang a, In hi a ban leh a bang RCC niin a chhuat thingphel a ni thung a, a chhuat hi a kang chhe deuh vek a ni.

 Kangmei chhuak hriat a nih veleh khawtlang mipuiten theihtawpin kangmei thelh hna an thawk nghal a, kangmei chhuah atanga rei vakloh ah fire department te thleng nghal bawkin kangmei hi an thelhmit thei a ni.

In neitu hi Kohhrana in hmang tak niin Kohhran lehkha pawimawh a kawl ang ang te pawh a kang tel ni a hriat a ni.

Nimin vek khan Lunglei Luangmual All NGO’s ten Emergency meeting nei nghalin vawiinah hnatlang an ko va, dist. magistarte leh police hotute pawhin nimin vek khan kangmei chhuahna hmun hi tlawhin thil awmdan an enfiah nghal bawk a ni.

April ni 13 Inrinni zan dar 10 vel khan Vairtengte chhim venga Sumneihkhawli (78) te chenna In Assam Type chu bungraw chuh hman lohin a kang.

Vairengte Chhimvenga kangmei chhuak hi Assam type niin, zan dar 10 vel khan inchung lam atanga kângmei chhuakin, mi tlawmngaiten thelh tum mah se gas cylinder puak avangin kângmei hi a chakin bungrua engmah chuh hmanlohin a kâng ral vek a ni.

Sumneihkhawli hi kum 78 mi chak vak tawh lo tak niin a tupa Lalherliana te nupa nen chengin an chenna in hi assm type a chung leh hnuai awm a ni a, Kangmei a chhuah hian kângmei laka a pi hi chhan chhuah tumin a tupa Lalherliana chuan pawmin kawngkapui atanga

chhuahpui a theih tawh loh avangin tukverhah a

zuanchhah pui a, Sumneihkhawli hi Vairengte Damdawiin panpui vat ni mah se meikhu a hip nasat avang leh kang hliam avangin an chhan

hman ta lo a ni.

Sumneihkhawli ruang hi nimin khan Vairengte CHC-ah postmortem niin an chungte Lallungawia In Vairengte Chhimveng ah an vui a ni.

Inrinni zan vek khan Dapchhuaha Manipur raltlan in, bungrua chuh hman lohin a kang bawk.

Dapchhuah, Tuikual venga Manipur raltlan Chhantua te chhungkaw awmna chu bungraw chuh hman lohin a kang ral a, kangmei chhuah chhan hi mombati chhit atanga kang nia hriat a ni. He inah hian an nupa bakah an fate 4 an cheng a ni.

Vawiin hian khawtlang in an chenna in tur hnatlangin an sak sak dawn nia thu dawn a ni.

Thlalak : file picture