Aizawl April 3, 2024 : AICC Executive Member Zodintluanga Ralte chuan Thorang bial chhunga Marpara area-a Hmunphiah ching Society te Hmunphiah hralhna man ba Rs. Nuai 54 chuang la awm chu a rang thei ang bera pek a phut.

Lok Sabha MP inthlan lo awm tur atana Campaign-a fehchhuak mek Zodintluanga chuan, April ni 2, 2024 (Thawhlehni) atang khan West Phaileng tlangdung atanga tanin vawiin khan Marpara leh Tuikawi inkar khua te a tlawh bakah, Bunghmun leh Zawlpui inkar khua te a tlawh.

Marpara a thu a sawi naah Zodintluanga chuan Thorang bial chhunga Marpara khaw chheh vel khua ten ZPM sawrkar ruahman anga Society an din, King Industry (Falkland Aizawl) hnena Hmunphiah an hralh tirna man, Cheng Nuai 54 chuang an la ba chu pawi a tih thu sawiin, "Kuthnathawktu hmakhaw ngai tak anga lan tum a, mipui te bumna leh tih beidawnna lian tak kalphungthar sawrkara hmuh tur a awm ta fo mai hi a pawi takzet a ni," a ti.

Zodintluanga chuan ZPM sawrkar duh dan angin hmunphiah chingtu te chu Society din tir an ni, a ti a. Kuthnathawktu te hian an rin tawk avangin Society ah hian Rs.100 chawiin an in ziak lut a ti. King Industry hnuaiah hian Marpara chhehvel khua atangin mimal leh chhungkua bakah a hlawm a pe te nen mi 269 ten hmunphiah hi an pe a ni, a ti. King Industry hian Rs. Nuai 20 chauh a la pek thu leh Rs. Nuai 54 chuang a la bat sak thu a sawi.

King Industry hian hmunphiah ro hi Kg 1 Rs. 75.00-a an lei laiin 2023 khan Kg 1 Rs. 120 in an hralh a. Kuminah kuthnathawktu hnenah hian King Industry hian Kg 1-ah Rs. 100 a lei tura an insawi laiin Rs. 75-in an lei sak niin Kuthnathawktu te hian Zodintluanga hi an lo hrilh a ni.