Hmunphiah chingte’n royalty sang an ti

zalenxhg - Feb 08, 2014

Hmunphiah chingte’n royalty sang an ti

Aizawl: Saipum khua a Hmunphiah chingtute chuan sorkarin royalty, kg khat zelah Rs.7 a la thin tih sawiin hei vang hian an hmunphiah te an hralh to theihloh phah niin an sawi. Zirtawpni kalta a Aizawl chanchinbumi thenkhat ten an kawm naah Saipum khawtlang hruaitute chuan sorkarin NLUP hmunphiah ah royalty kg khat zelah Rs. 3.50 leh ramhnuai (forest reserved) ami te kg ah Rs.7 zel lak tur a tih laiin NLUP a an tharchhuah ah pawh Rs.7 zel royalty a laksak thin niin an sawi a. Royalty a san em avang hian an hmunphiah pawh an hralh to theihloh phah niin an sawi bawk. Saipum VCP Lalrawngbawla chuan, "Revenue ah kan ram man (tax) kan pek hnuah kan thlai tharah ngei tax (royalty) kan pe leh hi na kan ti a, kan hrethiam theilo a ni," a ti. Saipum VCP chuan kum dangah chuan Forest department lamin survey te neiin NLUP tharchhuah leh ramhnuai ami te an thliarhrang a, mahse kumin ah chuan engmah an tilo niin a sawi bawk. Press mite hi David L.Thang liana, Chief Media Officer, NIB in a ho a ni. Saipum vela hmunphiah hi a tha chi 'Phiahpui' a ni a, a leitute pawhin an duh bik niin an sawi. Hmunphiah leitute hian a hring kg khat Rs. 20-25 leh a ro Rs.50 in an lei a. A ro hi Bhaga ah Rs.80 leh Silchar ah Rs.130 ten an hralh leh thin. Saipum khua ah hian NLUP a Hmunphiah trade thlangtu chhungkaw 257 an awm a, chhungkaw thenkhat a ro qtls. 25-30 thar te pawh an awm a ni.
Share now