February 21, 2024; Land Resources, Soil & Water Conservation minister Lalthansanga'n Hmunphiah chingtuten a hralhna kawngah harsatna nasa tak an tawh mek chu sawrkarin a hria tih sawiin, sawrkar in Hmunphiah ro leina tur rate bituk a neih laiin, a hring leina tur rate bituk a nei lo niin a sawi.

Vawiin Assembly Budget Session zawhna leh chhanna hunah Tuivawl bialtu Lalchhandama Ralte zawhna chhangin, Lalthansanga chuan, sawrkar chuan kum 2024 chhung atan bik Hmunphiah ro leina tur rate Grade-A ah kg khat Rs. 100 aia hniamlo leh Grade-B ah kg khat Rs. 80 aia hniamlo turin a bituk tih a sawi a, a hringa leina tur rate erawh a bituk lo niin a sawi.

Sawrkarin RR Associates-te inremna a siampui hranpa lo tih sawi bawkin, "Mizoram a Hmunphiah-te sawrkar rate bituk aia hniam lova lei a phalsak mai a ni," a ti a, Tax lakna tur provision siam tel a nih loh thu leh transit pass pe chhuaktu EF&CC Dept. hnenah erawh administrative cost Kg 1 ah Rs. 1 an pe ve ang, tiin a sawi.

Minister Lalthansanga sawi danin, Hmunphiah hring hi tiro turin hun leh tha tam tak senga buaipui ngai a nih avangin sorkar tan a hringa lei a remchang rihlo a. Chuvangin, a hringa hralhna rate pawh fix a ni ve ta rih lo a ni.

Hmunphiah hi zo leh phaiah a thar hun a in anglo hle a. A leitu pawn lam miten Vairengte leh a chhehvela a thar tih an hriat meuh chuan zo lam a mi chu a lo chang hman tawh hial thin a ni. He a thar hun in anglo avang hian a hring rate siam pawh a tih harsat phah bawk a ni.

Market Study Team-te zirchianna atanga thil pawimawh tak pakhat lo lang chu NLUP hlawhchhamna ber pawh a hring nen an buaipui tel vang a ni tih Lalthansanga chuan a sawi a, "Hmunphiah hi a buka hralh a nih avangin a hrin rei theih nan leh buk a rih zawk theih nan tuia chiah mai duh pawlte an lo awm a. Hei hian lei leh hralh kawngah inbumna a thlen chang a awm thin a ni," a ti. "Hengte avang hian sawkar lam atanga a rate bithliah loh mai tha zawka hriat anih vangin a hring leina rate hi siam a ni ta rih lo a ni," a ti bawk.