• BRANDISI CHIN NAN
  * Hmunpui leh Lengpui hi model village an ni.
  * A tiak 1 hi Rs 85 man a ni.
  * Hmunpui in Nuai 84 chuang dawng tawh.
  * Lengpui in Nuai 88 bawr dawng tawh
  * Kum 3 chhung enkawlna senso sorkarin a tum dawn
  * Enkawl zui lutuk ngai tawh lo tura ngaih a ni. 

Aizawl; Mizoram sorkar flagship programme, SEDP hnuai a Mau ching tur a thlan (model village) Hmun-pui leh Lengpui khua a beneficiary te chuan Mau (Brandisi) tiak 75,000 vel an phun tawh a, bamboo link road te laih mek niin ZALEN thudawnna chuan a sawi a. Brandisi chinna khaw pahnih beneficiary belh khawm zat chu 207 niin Rs 1,72,39,000 vel an dawng tawh a, a tiak pakhat man hi Rs 85 niin a thlawnin an dawng.

Hmunpui Village Bamboo Society Chairman R. Zokhuma Colney hnen atanga ZALEN thudawn danin Sorkar hmalakna a bamboo link road laih mek niin km 1 chuang laih tlang a nih tawh a. Hmunpui khuaah beneficiary chhungkaw 97 an awm mek thu te, bul an tan tirh a tanpuina an dawn nen, tun thleng a chhungkaw 1 zelin Mau hmun enkawlna atana sum an dawn zat chu chawhrualin Rs. 87,000 vel a nih tawh thu leh Brandisi tiak 35,000 bawr vel phun tawh ah an inngaih thu R. Zokhuma Colney chuan a sawi bawk a. Hetiang a nih chuan Hmunpui beneficiary te chuan Rs 84,39,000 an dawng tawh tihna a ni.

A sawi zel danin Horticulture department atanga an dawn Brandisi tiak chu nikum June thla khan phunin khawkheng in a tichhe nual a, departmen hmalaknain tunkar hian tiak thar dawn an in beisei.

Lengpui Village Bamboo Society Chairman Lalnunngila pawhin ZALEN zawhna chhangin Lengpui ah beneficiary 110 an awm mek thu leh chung miten a Brandisi tiak an phun tawh zat chu 40,000 dawn a nih thu a sawi a. Mau tiak an phunna te chu hmun rem sa a nih vangin link road laih ngai lo niin, beneficiary 1 zel in tanpuina chawhrualin Rs. 80,000 bawr vel zel dawng tawh ah an inngai a. Hetiang a nih chuan Lengpui  beneficiary te chuan Rs 88,00,000 bawr an dawng tawh tihna a ni.

Hmunpui leh Lengpui Village Bamboo Society hruaitute sawi danin, Brandisi tiak an dawn chu pakhat Rs. 85/- man niin, chu chu a thlawnin an dawng a, a tiak an phunna tur lo vah na, thlam sakna, mangkhawhna, a khur laihna leh a phunna leh a tiak phurhna man te sorkarin a tum sak vek a. 

Heng bakah hian a tiak an phun atanga kum 3 chhung enkawlna senso sorkarin a tum sak zui dawn a, an thawh chin ang zel an dawng nia thudawn a ni bawk a, chumi hnuah chuan enkawl zui lutuk ngai tawh lo tur a ngaih a ni.