Aizawl February 27, 2024: Mizoram Police chuan thuchhuah siamin phai lama hnathawh tuma, hna zawngte hriat turin thurawn an siam a, an thuchhuah siamah hian thalai hna zawng te chu fimkhur turin an duh.

Tun hnaiah Delhi leh a chhehvelah hna leh sum kaihhnawiha inbumna a hluar hle a, Delhi Mizo Zirlai Pawl pawhin January ni 30, 2024 khan mipuite hnenah thurawn an lo pe tawh. Hetiang inbumnaah hian Mizo thalaite an inhnamhnawih tih hriat a ni a. Hna hmuh hmain hna diltute'n Rs. Nuai 1 atanga Nuai 2 inkar an pek lawk a ngai thin a, an thawhna tura an sawi chu company pangngai tak ang thei turin ruahmanna siam thin a ni a, Mizo thalai lehkha thiam hna zawng mekte an bitum nia an hriat thu Mizoram Police chuan an tarlang.

Mizoram Police thuchhuah chuan, "Hna hmuh hma hauha pawisa pek ngai te, mahni sum dinhmun hrilh ngai leh hna thawk mumal si lova hlawh sang tak pek tiamtute hre chiang hmasa la, awihawm loh tak hna zawrhtute hre chiang zet ang che," an ti.