ZALEN Oct. 30, 2024; All Mizoram Pick-Up Association (AMPA) in hnam dang (vai) pick-up khalh tam lutuk tirem turin khauh zawkin hma an la chhunzawm dawn.

Thuchhuah an siamah AMPA chuan, Aizawl khawpui chhung leh Mizoram dung leh vangah kan ram leh hnam humhalh a lo nih zel theihna turin, hnam dang pick-up khalh tam lutuk tihremna turin February ni 11, 2023 atanga hma an lak tawhna chu November ni 1, 2024 atangin khauh taka chhunzawm leh an tum tih an tarlang a, motor neitute pawhin hnam dang Mizoram khua leh tui nihna pawh nei lo chu driver a chhawr lo turin an ngen.

AMPA hmalakna hi Mizoram Commercial Vehicle Union (MCVU) chuan an thlawp tih an tarlang, "Heng hnam dang driver te hian kan Mizo nula/tleirawl te thleng a sum pe in an khuaikhem thin ni a hriat a ni a, he thil hi a serious hle a, hnam anga kan mualphona a ni a, Zoram pumah kan tanrual a ngai takzet," tiin an tarlang.

Aizawl City Bus Owner Association (ACBOA) pawhin AMPA hmalakna hi an thlawp tih an tarlang bawk a, "ACBOA chuan hnam dangin min chimralna tur lakah kan ram, kan hnam kan him zawk nan AMPA hmalakna hi kan thlawp tlat," an ti bawk.

AMPA in November ni 1, 2024 atanga khauh zawka hma an lakna tur hian Inter-State service a huam lo a, City area town trip a huam dawn a ni.