ZALEN September 29, 2025 : Mizo film chhuak tawhah hnam dang inrawlhna a vang viau. Chu mai a ni lo, hnam dangin a thawnthu a ziah hi a awm lo viau ang. Mahse, tuna an buaipui mek erawh hnamdangin a thawnthu a ziah leh a produce a ni.

  Mizo film-a a vawi khatnan Maharashtra lam film director leh producer kutchhuak tur — White Poison (Tûr Vár) — tih chu buaipui tan a ni. Chawlhkar hmasa lam atangin shooting neih tan niin, he film hi buaipui zawh a nih hnuah India ram pawn thlenga release tum a ni.

  Tûr Vár — film thar turah hian mi thar tha tak tak an inlan dawn a. He film-a chang tur zingah, tunlai Mizoram a model hriat hlawh ber zinga mi Suzane Jaishi pawh kan hmu dawn. Model a nihna kan hre chiang tawh a, lemchan lamah eng nge a dinhmun tak kan hre chiang lehzual dawn a ni.

  He film-ah hian kan Mizo designer hlawhtling leh hriat hlawh ber zinga mi, Escape Engmoia pawh kan hmu nawlh dawn. Mizo designer hian a thiannu duh tak, mual liam ta Feli Fanai music video eng emaw zat a lo buaipui tawh thin; mahse, lemchan lamah hian sulhnu pakhatmah a la nei lo va. Engtiang chiah nge lemchan lamah hian a dinhmun tur a hriat theih ang.

  Mizo designer hian he film-ah a chang dawn a ni mai lo va, a ni hian custome designing lam pawh a buaipui vek dawn a ni.

  Anni bakah he film OST hi Youngfella in a buaipui mek bawk a, a ni hian hla pahnih a siam dawn a ni.

  Tûr Vár — film hi, kan tunlai Mizoram thil thleng leh tawn nen pawh a inmil dawn khawp mai — college zirlai thianho drugs leh ruihhlo danga talbuai ta te chanchin kan hmu dawn a. Zirtir a nei tha dawn hle. He film hian ruihhlo tihbaiawmzia leh thalai suattu anihzia lantir chu a thawnthu laimu tur ber a ni dawn.

  He film producer leh a thawnthu ziaktu, Ganesh B. Shelar chuan, “He film hi entertainment mai ni lo vin, society nena inmila siam a ni. Awareness a nih bakah mipuite a thil thleng thei tha tak tak inzirtirna leh thil thleng tak tak atanga ziah a ni,” tiin Zalen Thalai Khawvel a hrilh.

  Tûr Vár — film hi kumin chhung hian shooting neih zawh vek tum a ni a. A tihchhuah hun erawh nakkum lam ruahman a ni.

  He film hi Mizoram chhung mai bakah, Shillong leh hmun dangahte shooting neih chhoh zel a ni dawn. Chu mai a ni lo, he film hi Mizoram mai bakah Dubai leh Mumbai-ah release tum a ni bawk.