Tunhnaia Mizo Zirlai Pawl chuan Zofate inzawmkhawlehna kawng khat atan Zokhawthar ah Zofest hlawhtling takin an huaihawt a. Hetiang deuh bawk hian zirlai pawl dang Mizo Students Union pawhin Zo hnathlak unaute inzawmkhawmlehna atan nasa takin hma an la bawk a. Chumai ni lovin Mizoram a tlawmngai pawl lian ber Central YMA chuan Mizoram chhunga cheng hnam hrang hrangte unau kan nih lantir nan leh kan inpawh lehzual nan kar kalta mai khan Lammual-ah Joint Cultural Meet hlawhtling tak an buatsaih a. Lai leh Mara atangin zaithiam leh lamthiam engemaw zat lo telin hun hlimawm tak hman a ni tawh bawk a nih kha. Tunkar maia neih zawh tak Zofest hmanpuitu Chief Minister Lal Thanhawl chuan, "Kumpinu sawrkar policy divide and rule tuar nasa berte chu Zohnahthlak te kan ni a, ram pathum India, Bangladesh leh Burma ah te hian min then a, India ah phei chuan state pali Mizoram, Manipur, Assam leh Tripura ah te kan awm darh a. Chuti chungin kan inuana leh thisena kan inzawmna te hi a bo chuang lova. Tunah rih chuan rorelna pakhat hnuaiah awm lo mah ila, engtik emawni hunah chuan Pathian hian Zo hnahthlak te hi rorelna pakhat hnuaia min la awm tir ka ring a, chutiang turin tun atangin inpumkhat zai rel a, kan inlaichinna leh kan in unaunate ti chak turin kan ngaihtuahna leh rilru te senga hma kan lak a ngai a ni," tiin a sawi anih kha. Chief Minister mai bakah kan ram hruaitu hrang hrang, political party, NGO, zirlaite leh mipui ah nasa takin hnam inpumkhat pawimawhna kan hre thar hi a lawmawm a, chutih rual erawh chuan hmalakna tur erawh a la tam hle awm e. Khawvel hnam ropui kan tih te hi an ropuina chhan chu an lungrualna leh an thawhho thiam vang mai a ni. Mizote pawh hmun hrang hrangah awm mah ila kan tanrual tlat chuan hnam chak leh zahawm kan ni dawn a, chu chu an hlauh vangin min thenhrang a ni pawh a tih theih ang. Hnam inpumkhatna atan hian Zofate Jerusalem, Mizoram a cheng te hian mawhphurhna kan nei sang ber a ni tih kan hriat thar a pawimawh a. Kan unau thenkhat, Duhlian tawng an thiamloh avanga lo hmuhsit mai te, tlema an khawsak phung a hniam deuh avanga lo nuihsawh mai palh pawh thil awm thei a ni. Kawng hrang hrangah nu leh pa chan changa huikhawm hi kan tihtur a ni tih i hre thar leh ang u. Tunhnaia Zofate insuihkhawmlehna atana hmathar lakna, a bikin thangtharte zingah nasa tak a awm chho hi a lawmawm a. Hmun hrang hrangah awm darh mah ila Mizote hi tangrual thiam ngat ila chuan hnam zahawm tak kan ni thei tih i hre nawn fo ang u. Hnam inpumkhatna atana hmalakna hi mipui ten kan tawiawm thiam a ngai a, zirlaite leh tlawmngai pawl te hian nasa lehzualin hma han la se. Raltiang kai turin leh an hmalakna tawiawm a, puibawm turin an hnungah mipuite kan awm ni tih hre thar leh teh se.