Ramchhana Hmar
Phuaibuang

Pa inngaitlawm, thil chik mi, a lan dan mai chuan a hmanhmawh chang pawha hmanhmawh hmel pu lo, a chet phung en mai chuan cowboy ang mai a ni. Cowboy hovin nunna thapa puak ruk an phawi hmaa muang fan raiha an chet leh pistol an phawi hnua rang taka an chet dan nen hian ka tehkhin thin, chu ka tehkhin chu mi dang ni lovin, ‘Hnam ropuite u, tho r’u le,’ tih lehkhabu ziaktu, Lalhruaitluanga Chawngte hi a ni.

Kar hnih lai a liam taa, kar thum a pum tep tawh he lehkhabu, Hnam ropui te u, tho r'u le, a tihchhuah hian thalaite beng a verh hle a, lei a hlawhin chhiar a hlawh a. A nei ve loten neih an châk a, he lehkhabu hi phek 95 leka chhah a ni nain, chhiar a manhla hle a. A la nei lo leh ala chhiar ve lote pawhin lo lei ula, lo chhiar ve teh u. Pi leh pute hun atanga vawiin ni thlengin he lehkhabuah hian a chuang a, hetianga lehkhabu tha hi hri leng avanga kan tawm tlawk tlawk lai leh kan mangan laia ziah leh tihchhuah a ni a, ani u Hruaitea zawng, a taimakna chu thuhran nise, a ngaihna hi a hre bik thin ngawt mai. Thalaiten an ngaihven nu leh pate pawhin an lei nasat a nih avangin a ngaihventu an zau a, a tihchhuah atangin ni tam la liam lo mah se, a darh zau tawh hle.

A bu chhungah engtiangin nge thu a kalpui a, eng thupui nge a thlurbing a, eng lam hawi nge a nih tih chu a chhiartuten an hrechiang ber ang a, a la chhiar lote pawhin chhiar ula inhrechiangin inngaihlu ve khawp ang le. A ni, U Hruaitea hi lehkhabu ziah thiam a ni satliah lo, thuziak uluk mi a ni tih chu a kutchhuak a sulhnu atang hian kan hre thei awm e, he lehkhabu, Hnam ropuite u, tho r’u le, tihah pawh hian a chhung thu hi a uluk tih a hriat hle a, A AW B a rem fuh em emte hi a kutchhuak ngainatute tan chuan a hlu hle mai. A tawn hriat leh mi dang kâ atanga a hriat pawh nise thil a chikin a chhinchhiah chiang thin hle a, belhchian a dawlin U Hruaitea kutchhuak a nih tawh chuan ngainat a awl em em mai thin a nih hi maw.

He lehkhabu, Hnam ropuite u, tho r’u le, tih atang hian lehkhabu ziaktute, ziak mi kan tihte ngaihsan awmzia hi ka hre nawn fo thin, a chhiartu lam pawhin lehkhabu tha kan tehna pakhat atan lehkhabu chhunga thuziak hian belhchian a dawl em? Mizo tawng a ziah dan a dik em, a kuthnu a mâm em, tihte chik zel ila, a ziaktute pawhin tha lehzualin an ziak ang nga, lehkhabu tha, chhiar manhla, lei iaiawm loh lehkhabu a lo chhuak zel dawn a ni.

Hnam ropuite u, tho r’u le, tih kan chhiar atang hian hun kal tawha hnam ropuite sulhnu hre chungin thangtharte hian an hnung zui hi kan tih atan a mawi, kan tih tur a ni. Kan pi leh pute sulhnu hi a pawr lem lo va, chhui zui châkawm tak tak tam tak a awm a, chhiar liama ngaithla liam mai lovin an hnung zuitu nih kan tum tlat a va pawimawh em. A ziaktu sawi angin he lehkhabuah hian kan chanchin, kan pi leh pute chanchin, min thlahtute sulhnu engkim mai hi a awm a, han chhiar ve mah la, a ni maw i tih mai loh nakah. 

Tunah hian he lehkhabu hi chipchiar takin sawi zau ka tum lo va, he lehkhabu ka chhiar atanga kan rilrua lo awm thenkhatte ka sawi mai chauh a ni, a chhiar tawhten tha an ti a. A la nei lote pawhin neih an tum mek ni pawhin ka hria. Kum 2021 hian chhiartute zingah lehkhabu tha thlan tur nise, chhiartute chanchin Hnam ropuite u, tho r’u le, tih hian dinhmun sang tak a thleng chiang viauin ka ring. A ulukin a chik a, a thu thleh kawi dan a mawi em em a, sawi vak aiin chhiar mai khan a nihna tur a chiang viau a ni. He lehkhabu ziaktu hi hnam ropuite zinga mi, Zo tawng ngeia kan biak phak, bai kan hmehpui, chawhmeh tui hawp ve thin. Melzial leh sahdah min lo theh teh tih tawngkam man thiam Mizo tlangval ngei a nih avang hian a chhuanawmin a ngaihsan awm hle.