Tunhnai chho khan YMA Sub-Hqrs., Serchhip chuan khawmpui neiin an thurel zingah hnamdang dan lova awmte dapchhuah nise tih an rel a. Nimin piah lawkah Zampuimanga Group YMA khawmpui pawhin hnamdang dapchhuah beihpui thlak nise tih an pass bawk. YMA Sub-Hqrs. dangte leh Group YMA te pawhin hetiang zawng hian hma an la chho dawn niin a lang. Heng hi YMA kumpuan 'Ram leh hnam humhalh' langsar tak a ni chho dawnin a lang. MA chauh ni lovin, zirlai pawl MZP leh MSU bakah pawl eng eng emaw, dan lova Mizorama hnamdang lut tam lutuk tia veitute pawhin a khat tawkin heng dan bawhchhiaa Mizorama awm te dapchhuah hna hi an thawk fo tawh a, an la thawk zel ang tih a rin theih bawk. Hetianga dan lo/dan bawhchhiaa hnamdang, Mizoram-a lo lut an tam thu hi tlawmngai pawlte hian an auchhuahpui mai ni lovin, dan lova sumdawnna thlenga thuk taka an inrawlh thin avangin an ngaimawh a, ram leh hnam tana tha zawk tur nia ngaiin a dapchhuah hna an thawk thin hi thil lawmawm tak a ni. Hetih laia mi thenkhatin, dan lova Mizorama sumdawng leh awmte dapchhuah hna kalpuina kawngah fimkhur a tulzia an tlangaupui ve reng bawk a, an tihtur pawh a ni bawkin a lang. Amaherawhchu, ram leh hnam hmakhua thlir chunga hma la thinte finchhuah zawng ni lo, a sawisel leh a ep zawnga chetna awm thin erawh hi chu thil tha ber a ni lovang. Hetih rual hian, dan bawhchhiate manchhuah leh zawnchhuah chungchangah, dan bawhchhe ve kher lova hmalak dan a awmin a rinawm a, chutiang zawng chuan tlawmngai pawlte pawhin fing tak leh fimkhur taka hma an lak a tulin a rinawm. Dan bawhchhia an nih avanga dan bawhchhe bawka hnawhchhuah tum emaw chu thil dik a ni lova, chuvangin, hma la tur pawhin kalphung fel tak duan a tul. 'Dan bawhchhia an ni e' tih vanga nawr bawrh bawrh mai chu a leh a linga mualpho letna a ni thin a, chu chu Mizorama NGO thahnemngai tak takte hmai tibaltu a ni fo. Dan bawhchhetuten an khinlet theihna remchang siamsak lo zawnga ruahmanna fel tak siama ram leh hnam humhalh dan dik ngaihtuah chhuah a tul khawp mai. Dan bawhchhiaa Mizorama lo lut, ILP chungchanga nise an permit hmuhna ang ni lova thilti engemawzat an awm tih hi a chiang a. Hei hi sorkar chak lohna lantirtu ni bawk mahse, sorkar tan engkim ven sen rual a ni lova, chuvangin, NGO te nen tang tlangin, dik tak leh huaisen taka ram leh hnam rilru pu chunga tanho dan hi sorkar lam pawhin a ngaihtuah a tul ta niin a lang. Ram leh hnam hi eng vanga humhalh ngai nge, tunge humhalh ang, eng tianga humhalh tur nge tihte thleng hian pawl chhungah chauh ngaihtuah lovin, chhungkua atanga inzirtir a tha in a rinawm. Ram leh hnam tana him lo zawnga hnamdang sumdawng thurualpui hi Mizorama dan lova hnamdang sumdawngte inkhuar nghehna lian tak a nih a rinawm! Awlsam zawk leh hlawk zawka sum an hmuh theihna tur ngaihtuaha dik lo taka lo hnamdang thurualpui thinte hian anmahni zahawmna mai ni lovin, ram leh hnam zahawmna an hralh tih inhria se a tha hle ang. Ram leh hnam humhalh kan tum rual hian, Mizote hi Mizo hlang chauhva khawsa thei an ni bik lo tih an inhriat a tul a. Mihringte chu inmamawh tawn vek kan nih avangin, thliarkar rilru pua inhung bing reng thei kan ni dawn lo tih pawh hriat tel a pawimawh a, hnam dangte chimrala kan lawm lohna tur chuan nasa taka kan inzirtir a ngai tel bawk tih hi hrereng ang u.