Aizawl: Minority-te tana dah hran, Scheme for Providing Education in Madrasa/Minorities (SPEMM) atanga sum lak chhuah thin chu kum 3 chhung hnathawh dan mumal thehluh tawh loh a nih avangin sum hmuh belh zel tur vaibelchhe 3.4 dawn chu la hmuh chhunzawm theih lohin a awm mek a, kum tharah pawh Mizoramin a hmuh zel tur a chan thei dawn niin kan thulakna chuan a tarlang a. Zirna in awm ni miah lo la an awm bakah a dawngtu sikul thenkhat chuan a hmanna turah an hmang lo niin kan thulakna chuan a tarlang bawk. He scheme hi Mizoramah chuan Home Department hnuaia kalpui niin a buaipuitu hi Mizorama consultancy firm lar tak niin thudawnna chuan a sawi. He scheme SPEMM hnuaia Infrastructure Development of Minority Institutions (IDMI) atang hian 2013-2017 thlengin sikul 60 chu sak thatna dil sak an ni a, pakhatah Rs. Nuai 50 thleng dil theih niin Rs . Nuai5-17 te dilsak a ni tlangpui a, 75% chu Central tum tur a ni. Fund hi Classroom, drinking water leh inthiarna atan dil sak an ni bawk a ni. 2013 atangin kum tinin 2017 thleng khan 1st installment pek chhuah thin nimahse hna kalpui zel dan thehluh a nih ngai loh avangin 2nd installment chu pek chhunzawm a la ni lo niin Zalen thulakna chuan a tarlang bawk. “Hei vang hian 2nd installment hi chan thei dinhmunah kan ding mek a, thingtlanga minority sikulte tana puih dilna kawng a ping thei a ni,” tiin hnathawk pakhat chuan Zalen a hrilh a ni. Zalen-in a bawhzuinaah thenkhat chuan an sum hmuh chu thil dangah an hmang nia thudawn a ni a, zirna in tlemte chu an awm leh awm loh hriat chian theih a ni lo bawk a ni.  “Financial rules ah chuan a hnathawktu firm/consultancy hian sumin a sem tur niin a lang lo a, construction hi a hna hmu tu kuta awm a ni,” tiin thudawnna chuan a sawi bawk. Dan ang chuan zirna in chu School Education Department in phalna a pek a ngai a, NCMEI Act 2004 tlawh chhanin minority sikul an nihna chu Commissioner/Secretary School Education Department, GoM chauh chu phalsak theitu (competent authority) a ni bawk a ni. Thudawnnain a sawi dan chuan minority institution scheme dawng tura phalsak theitu hian engmah a hriatpui lo bawk a ni.