Mahmuaka Chhakchhuak-

Mizoramah hian sorkar hnathawk mi 50,000 vel awm niin an sawi a, anni hian mahni hna ang theuhin thawk sela tun ai hian hmasawn tak tur kan ni tiin an sawi thin. Engvanga hmasawn lo nge tih chuan thlahdah taka hna an thawh vang a ni ber awm e. Zing dar 10;00 atanga tlai lam dar 5;00 vel thleng hi office hnathawh hun chhung angah hian taihma leh rintlak takin hnathawh ni theuh sela chuan chuti takin kan ramah hian sorkar hnathawkte hi sawisel an ni kher awm lo e. Inthlahdah chhan pawh hi a tam ber chu Kohhran lam thil vang ni tein an sawi lehzel bawk a, a dikna tak hre turin chhui bingna awm chiah lo mah sela a ni thei mai awm mange tih theih chu a ni. 

Kohhran hi kan dah pawimawh hle mai a; nimahsela, kohhran lama chanvo kan neihna chuan kan hnathawh, kan eizawnna lam kawng a tihsukuk tlat si chuan thil tha tak a ni thei chuang lo ang. Pa pakhat chu kohhranah chanvo sang tak mai nei a ni a, pastor thachhang dawltu ang deuh thaw hial a ni awm e, a eizawnna, a hna ber erawh sorkar hnathawh a nih avangin kohhran lama a dinhmun a pawimawh bawk si avangin chawlh a dil fo mai a, an pute pawh chuan hrethiam takin chawlh an lo pe thin bawk a. Nimahsela, chu pa chuan a chawlh loh karah a hnathawhah chuan midang aia thawh that bikna a nei chuang miah lo maiin office hnathawh chhung ngei pawh chuan a taima fal bik chuang hauh lo mai. Hei hi thil pawi tak a ni awm e. Kohhran rawngbawltu zahawm tak a nihna chu a hnathawhna hmunah ngei pawh chuan lantirin a thawhpuite ngei pawhin an fak a, an entawn theihna turin thawk ta zawk sela a tan pawh tha tur a nih laiin midang aiin a hnathawh thatna bik a awm si lo. 

Office pakhata a hotu deuh ni phak pakhat pawh hi kohhran leh khawtlang lama inhmang mi a ni bawkin amah pawh a fel viau ni tur a ni a, an fak viau bawk a ni awm e. Nimahsela, office lama hmanraw mamawh chi hrang hrang (stationeries) te chu a heh riauin an hria a, an han chhui deuh chuan khawtlang lama a inhmanna hmunah chuan alo hmang thin niin an hria a. Heng xerox paper, stapler pin leh file cover te hi a rukin a lo hawn thin ni tur a ni a, amah hrechiangtute chuan inhmeh lo an tiin mak an ti viau a ni awm e. heng thilte hi office lam buaina khawp tur erawh chu a ni hauh lo ang a, hnathawh tih khailakna tham tur pawh niin a lang lo. Nimahsela, amah ber zawk chu khawtlang leh kohhranah mi tangkai tak nia a lan laia chutiang ti duh a ni tlat si chu thilmak tak zawk chu a ni.  Kan kristianna derdepzia en hi chuan hetiang mi hi kan tamin a rinawm a, thilmak vak pawh a ni tawh lo hial zawk mai thei e!

Tin, thlabia hlawh kan lak thin avang hian hun hi kan hlut lo viau niin a hriat bawk a, hei hian kan hnathawhah ngei pawh dawngdahna a thlen lo thei lo a ni. Office hnathawh hun chhung turah mitthi inah kan kal a, inneihna hmunah kan kal bawk a, mitthi râl tein kan la kal fo thin bawk hi kan hnathawh that lohna pakhat chu a ni chiang a ni. Tam tak hi chuan office hna a awm loh avanga hmun danga chhuah mai emaw In lama haw mai emaw te hi an ti thin a, hei pawh hi eirukna bawk a ni. Mihring lamah chuan ho deuh pawhin kan ngai a ni mai thei a, chung lam thlirna atang erawh chuan cheng sang tam tak eiru nen a danglamna a awm hauhin a rinawm loh. Amaherawhchu, keimahni zawk hian kan palzam tak fo avang hian sualah kan ngai tawh lo mai zawk ni tein a hriat a, tunah phei chuan inthurual takin hma tak taka hawngte pawh hmuh tur an awm ta fo mai hi a pawi ngawt mai. Office pawimawh zual bik, mipui tana hnathawktute ngat hi chuan mipui dawr theih tura hunbi ang taka an hnathawhna hmuna an awm hi a pawimawh lehzual a, chutih laiin thenkhatte lah chuan inlak-eng e-maw-na atan hnathawhna hmunah an lo awm lo fo bawk lehzel a… Zahthlakin. 

Sorkar hna chauh a ni lo a, mimal leh NGO leh company lam hnathawhna hmunah thleng pawh hian kohhran lam rawngbawlnain hnathawh a tihbuai fona hi a awm tho mai a. Kristian ram kan nih angin kohhran lam chu kan dah pawimawh tur chu a ni nameuh mai nain kan hnathawhna lehzelin a tawrh phah fo mai chuan a dik thei hauh lo ang. Hetiang a nih avang hian kan hnathawh hunbi hi siam rem ni ta zawk mai sela tiin hetiang hian ruahmanna han siam dawn chhin ta ila; zing dar 10:00 atanga tlai lam dar 5:00 thleng hi hnathawh hun atan nisela, chu chu darkar 8 a lo ni a, darkar bia hlawh pawh inpek ni sela, darkar khatah Rs. 50 emawa hlawh inpek a nih chuan darkar 8-ah chuan Rs. 400 an hlawh thei dawn tihna a ni ang. Tlai lam dar 5:00-a ban a nih pawh hian zan lama kohhran leh khawtlang thiltihnaa tel duh tan pawh an tlai kherin a rinawm loh a. Hnathawhna lama la thawk chhunzawm zel duh tan pawh la thawh zel theih bawk turin ruahmanna siam ni bawk sela hun kan ngai pawimawh ang a, hnathawktu tan ngei pawh thahnemngaih a awl zawk ngei ang. Chhuanlama kohhran lam hmang fo tan pawh darkar bia hlawh neih a nih tlat si chuan thahnemngaih a awl viauin a rinawm. 

Hetiang hian sorkar hna chu darkar bia hlawh siam a rem lo mai thei a, mi mal leh company lamah chuan a harsa lo zawk thei. Engpawhchu lo nisela, hnathawktuin a hnathawhnaa rilru pe taka a thawh chu a pawimawh ber avangin sap thufingin ‘work is worship’ an lo tih ang ema Pathian biakna ang hiala hnathawh hi kan ngai lo a nih pawhin mahni hna pawh thawk ila rintlak taka kan thawh theuh hi mi pangngai tih tur chu a ni. Hnathawh hi zahawmna leh zahawm lohna tehna hmanruaa kan lo ngai a nih pawhin hnathawk thate chu an hnathawh a sang emaw a hniam emaw mi zahawm an ni tho tho ang.