Aizawl October 8, 2024 : Health Minister Lalrinpuii chuan National Health Mission hnuaia hmalakna pakhat, National TB Elimination Programme leh Piramal Swasthya tangkawp buatsaih ‘TB Free Workplace Initiative’ chu Mizoram Sawrkar office– MINECO ah a hawng.

TB umbo beihpui thlak mekah Kum 2025-ah chuan TB natna tihrem hman tumin kawng hrang hranga hmalak a nih tawh a, ‘TB Free Workplace Initiative’ hi tun tuma hmalakna turin duan thar a ni. He hmalakna kaltlang hian thawktute chuan damlo leh TB inringhlel te chauh endik tawh lovin, mipuite chu an hnathawhna hmuh ah kal chilh a, a duh apiang tan test kalpui tur a ni. 

He hmalakna hnuai ah hian ‘Portable digital X-ray machine’ leh AI assisted diagnostic software hmangin TB vei leh vei loh hi Doctor ten rang takin an endik nghal thei a. Vawiin ah pawh hian nilengin MINECO ah chuan a duh apiang tan free-in test hi an kalpui a, hnathawhna hmun hrang hrangah pawh la kalpui zel tura duan a ni.

He hunah hian Minister Lalrinpuii chuan, “Mizoram hi TB umbona kawnga hmalaknaah India ram a Model State ni turin Sawrkar laipuiin min rawn thlang a, State dangte entawn tur kan nih avangin kan hmalak dan tur te hi uluk taka kan duan a ngai a, hetiang hmalakna innovative deuh mai kan official ten an lo duang chhuak hi a lawmawm ka ti hle a ni,” a ti. Theihtawp chhuaha TB umbo a nih theih nana thawhhopui ah Mizoram mipui a sawm bawk a ni.