Chief Minister Lal Thanhawla chuan sawrkar hnathawk te chu mipui te tana dawr nuam, a mamawhtu leh dawrtu te tann beiseina leh thlamuantu ni turin a chah a. Kan ram hruaitu lu berin vantlang hriat ah meuh hetiang thu a sawi ta hian ngaihtuah a ti thui a, sawrkar hnathawkte a inenlet a hun ta niin a lang. Chief Minister hian sawrkar hnathawkte hi a fuih anih rualin sawrkar hnathawkte pawhin inenfiahna tur tam tak an nei a ni tih an hriatthar atan a sawi anih a rinawm zawk.
Sawrkar hnathawkte hi Mizoram ah chuan an pawimawh em em mai a, state dangte angin company leh factory lian, mi tam tak tak chhawr thei ang chi hi kan la nei ve lo a. Hlawh an lak har chuan pawisa lengvak a tlem a, mi rethei ber thlengin kan tuar mai thin. Chubakah Mizoram chu Kohhran leh NGO nei tam kan ni a, sawrkar hnathawkte hi lehkhathiam an nih hlawm avangin Kohhran ah leh pawl hrang hrangah pawh chanvo an chelh tam hle a ni.
Sawrkar hnathawkte hi buai leh tul tak tak, chhun leh zan pawh sawilo leh office tan hun hmaa thleng a, ban hnu thleng pawha hun rei tak tak hnathawk thin an awm rualin tam tak hi chu inthlahdah tak tak, an hlawh phulo khawp a thawk ve mai mai pawh engemaw zat an awm bawk. Buai tak tak lai chuan hnathawh hah nen tlema tawngkam vin deuh pawh lo hman mai pawh thil awm thei a ni. Mahse hetih kawngah hian sawrkar hnathawkte hi an insum lehzual a pawimawh.
Office hrang hrangte hnathawh dan leh an kalhmang a hrang thei viau mai a,pisa a thawk theuh theuh pawh mahni chan lo lam chu hriatloh theih tak a ni. Chutih mek laiin office a ni khat pawh thawk ve lo tan chuan office kalphung chu hriatloh theih tak a ni. Hetih hunah hian sawrkar hnathawk ten anmahni dawrtute hawihhawm taka an lo chhawn thin a pawimawh. Thingtlang atang ten khawtlang leh mimal thil pawimawh ah office dawrin khawpui lian zawkah an zin ve a, sawrkar hnathawk thenkhat anmahni dawrtute pawh enchiang mang lova lo chhang mai mai te, tawngkam vin lo hmang mai te, biak chhunzawm dawn pawha ngamawmloh deuh te hmun thenkhatah an awm thin. Heng mite hian an thawhchhan an hre lo a, kawng lehlama sawi chuan thawk tlak an ni lo pawh a tih theih hial awm e.
Sawrkarin uluk taka a ngaihtuah hnuah an hlawh phutawk nia a hriat angin thawktu tur a la thin a, chung mite chuan taima tak leh thahnemngai taka a ruaitu tana an thawhlet kha an bat a ni. Mi thenkhat, chhuanlam ho te te siama pisa tlai reng mai te, pisa ban hun hmaa haw mai ching te, chhuanlam fahrah te te hmanga office chawl fo mai te an awm thin. Sawrkar in pisa kai hun a siam vawndikloh te pawh hi ‘corruption’ chi khat a ni a, Kristian te tan chuan tih loh tawp tur thil a ni. Sawrkar hian hnathawk thalo te hi a hrem rualin hnathawk thate chawimawina hi nei thin ta se tun ai hian hawihawm kawngah hma kan sawn ngei a beiseiawm bawk.
Chief Minister thusawi hi sawrkar hnathawkte hian a tha zawnga inenfiah nan hmang thei se, dawr nuam zawkin awm tum hram teh se. A hlawkna teltu tur chu sawrkar leh mipuite hi kan ni dawn si a.