Vawiin (12.9.2024) khan Vaivakawn khawtlang chuan Vaivakawn leh Chawlhhmun inkar kawng, ni 1.9.2024 a Sangthanmawia in chimin lirthei kal tlang theih loha a hnawh chu two wheeler kal tlang theihin an siam.

Vaivakawn YMA hruaitute hnena atanga Zalên thu dawn danin Vaivakawn Zohnuaia in chimin kawngpui a hnawh hi disaster management lamin khawih chet a la him loh thu an sawi a, chhun leh zanah police duty an la awm reng thu an sawi.

Vawiin chhun khan Vaivakawn khawtlang chuan building tlu chhia khawih che lo zawngin kawng titlang tur hian hna an thawk a. He kawng pal tlang thinte chuan two wheeler tal kal tlang theih an duh vangin hma an la ta niin an sawi.

YMA chuan hnatlang ei tur sawhchiar an buatsaih a ni.