Aizawl November 28, 2022 : Home Minister Lalchamliana chuan, Assam sawrkar nen ramri chungchanga Gauhati-a Assam nena an inbiakna chungchangah, Assam nena ramri chungchangah hian Boundary Committee in a duhdan ang zela kal a nih tur thu a sawi a, mi thenkhat ngaihdan ang chu tunlai khawvelah a hman theih tawh lo, niin a sawi bawk.

Vawiina MNF Hnam Run-a thu a sawi naah Home Minister chuan, "Zawhna lian tak awm mek chu, ‘Mizoram-in kan hauh mek, 1875 Innerline forest area hi kan duh ang ngeiin Assam hian min pe ta se la. Assembly Constituency panga (5) rinluh a ngai dawn a, kan duh tak tak ang em?’ tih hi zawhna lian tak, opinion poll lak hialna awm a ni.' Mi thenkhatin, ‘Kan umchhuak vek anga ni mai lawm’ an ti ngawt a, tunlai khawvelah chutiangin a chet theih tawh loh tih hi kan hriat tlan a tha a ni," a ti.  Home Minister chuan "Ramri buaina chu chawlhkar khat maia chinfel theih pawh a ni lova. Ramri chungchangah chuan dawhthei taka kan chet a, dawhthei taka kan pen a ngai a ni," a ti. 

Mizoram kuhva thar chhuah hralhna kawnga harsatna pawh inbiaknaah sawilan a nih thu Chama chuan sawiin, "Kuhva hring Assam in a dang ringawt hi a dik lova tihtawp dan zawn nise tih sawiho a ni a. Home Department-a DIG level-ah sawihoa chinfel dan zawn ni rawh se, tiin thu dah a ni," a ti. Lalchamliana hian meeting an chawlh laiin Assam Chief Minister-in a rawn bia tih a sawi a. Assam Chief Minister chuan kuhva hring sumdawnna tawp thut chu ama tihtawp a nih loh thu a rawn hrilh niin a sawi a, Union Ministry thu-a tihtawp a ni zawk tih leh Union Minister Amit Shah-a dawr dawn tih a hrilh a, hetah hian a sawichhuah tur thu leh Mizoram Chief Minister pawhin lo dawr zui ve tura hrilh turin a ti, tih a sawi. Hetianga thutlukna an siam takah chuan DIG level-ah inbiakna a chinfel nise tih thudah an neih pawh paih a ni leh tih a sawi bawk.

Myanmar lam atanga Kuhva ro lo lut chungchang Mizoram sawrkar hian theihtawp a chhuah thu leh Kawngpui dunga check-na tur hmun hnihah siam a ni tawh a, heti chung hian 100% kan man thei hauh lo, a ti. Home Minister chuan, "Myanmar nena kan inri na atanga KM 15 vel hi Assam Rifle chan a ni a, Bangladesh border hnaih lam hi BSF mawhphurhna a ni thung. Mahse, heng duty hi an lo paltlang leh zel tho mai a. Keimahni mi leh sa, kuhva chingtute tan harsatna a thleng a. Mizoram sawrkar tih theih bak a nih tlat avangin vawiin thlengin duh angin kan la titawp thei lo a ni," a ti.