Aizawl May 6, 2024 : BJP Spokesperson Lalremsangi Fanai (Tetei-i) chuan Mizo Nula pahnih Dubai Housemaid hnathawka awm an hnathawhna hmuna harsatna tam tak tawk lo haw boruakin Mizoram mipuiin a ngaihven a. Inhnialna mak pui pui leh indemna, sawrkar mawhpuhna thlengin Social Media, TV leh Chanchinbu lamah a lang a, social media-a insawi chhiatna chu duhtawk turin mipui te a ngen.

BJP Thupuangtu chuan, "Housemaid atana State pawna hnathawka kalte hi chhungkaw harsa deuh vek an ni a. An harsatna tawh pawh thenawmte leh sawrkara thlen an inthlahrung a, an lo haw hnuah pawh an biru chawih chawih umzuiin deusawh lam rawng kai hmuh/hriat tur a awm a. Whatsapp/Facebook/Instagram chhunga inpuhmawhna leh insawiselna nasa lutuk hian Mizo Society/Community chhungah thil tha lo a thlen mek a. Social Media lama thu dik tawk lo hmanga insawiselna leh inchotuahna, indeusawhna ang chi hi duhtawk tawh ila. Mizoram Sawrkarin hmalam hunah enge a tih, enge hmalakna awm tih thlirin, rilru i seng vek ang u," a ti.

Lalremsangi Fanai chuan, "CM Lalduhawma’n Agency te thlavang hauh zawnga a thusawi awm chungchang ah ram nu leh pa a nih angin a hnena kal te a ngaithla vek lo theilo a, Agency te tawngkam thiam ten a hnena an thu thlen te vang a ni tih a a lang. Khaihlum tur meuh pawh ngaihdam theihna India ram (President in), mipui siam sawrkar inrelbawlna ram kan ni a, ram hruaitu te tan pawh duh reng vang nilo a tawng fuh tawklo a awm fo thei awm e. CM pawhin Agency te lakah case siam a nih tawh thu a sawi a, dan in a kawng a zawh chhoh beisei ang," a ti.

"Ram pawn chungchanga 4.1.2024-a CM New Delhi zinin External Affairs Minister S. Jaishankar hmua Myanmar ram buaina chinfel thuai a tulna, Mizoram chhunga rawn Refugees te dinhmun, Ramri hung leh FMR avanga India ram chhunglama harsatna awm theite a sawipuite hian rah tha a chhuah ngei beisei bawk ang," a ti bawk.

Syria-a Mizo Nula 3 te chungchang sawiin, "Syria a Mizo nula pathum te hi Syria Agencies-in Dubai atangin US Dollar 4000 theuha an lei chhuah a ni tih min hrilh. Housemaid nula pathum ten an thawhna ah US Dollar 200 an hlawh a. India/Mizoram Agent ah thla tin US Dollar 200 an thawn bawk thu Embassy kaltlangin hriat a ni. Oman Agent te hian Dubai Agent atanga Housemaid pakhat lei chhuah nan Oman Riyals 850 (India pawisa Rs. 1,82,000/-) zel an seng thin. Hetiang ang hi danlo a mihring hmanga sumdawnna Human trafficking huam chhung a tel a ni. Pathian venna hnuaiah dam takin Mizoram an rawn thleng ngei ang tih ring in, an chhungte pawh thlamuang taka awm tawh turin ka duhsak," a ti.