Covid 19 vangin India ram chuan kaithar leh thihpui  a ngah tawh hle a. Hripui thawh hnihna an tih mai ‘second wave’ hian state tam tak a tibuai a, hmun tam takah curfew puan a niin lockdown hial sawi rik a ni leh ta. 

India ram state zingah Maharastra, Punjab, West Bengal, Delhi-ah te chuan tun hnai chhoah Covid vei thar hi an hmu tam hle a, nikum he hripui a hluar hnua ni khat thil thua hmuh tam ber ni te a thleng leh tawh. 

Hei hian Mizoram pawh a nghawng lo thei lo a, Mizorama hripui vei tlem tê awm kha tunah chuan a pung chho nasa leh tawh hle. Mizorama hrivei an tam chhan hi phailam atanga lo haw zingah hrivei hmuhchhuah an tam vang niin a lang.

Mizorama natna hmuhchhuah Integrated Disease Surveillance Project lama hotu Dr. Pachuau Lalmalsawma chuan Mizorama hrivei an pun chhoh chhan chu state dang atanga Mizoram lo lut te ah Covid-19 hmuhchhuah a tam vang niin a sawi a. "India ram laili zawkah a hluar chuan Mizoramah pawh hri hi a hluar ve lo thei lo a ni,” a ti a. “India ramah hripui thawh hnihna hi a intan niin a lang a, India dinhmun a zir leh awmdan ang zelin Mizoram pawh hi kan awm niin a lang,” a ti bawk.

Mizoram sawrkarin inkaihhruaina Standard Operating Procedure (SOP) a siamah chuan RTPCR hmanga in test, an result negative te chu darkar 96 a ral hma chuan test nawn ngai lovin Mizoram an luh phal a ni a, darkar 96 a ral hnuah erawh test leh a ngai thung. Sawrkar inkaihhruaina siam ang chuan Mizorama lut tur reng reng chu ramri ah RAgT hmangin Covid-19 an vei leh vei loh enfiah zel tur a ni. 

Mizoram ah January thla khan Covid-19 positive 156, February-ah 51, March-ah 53 bakah April 1, 2021 khan Covid-19 positive mi 8 hmuhchhuah an ni. March thla chawhma lam khan positive hmuhchhuah hi an tlem a; mahse, chawhnu lam atang khan a vei hmuhchhuah hi an pung chho leh ta a ni.