Kum engemawzat kaltaa in hrang changa kan khawsak tan tum khan, inchhung bungrua mamawh lei tur kan han sawi kan han sawi a, Istiri chu kan mamawh hmasak zinga ka ngaih, kan lei hmasak pawl tak a ni a. Kan phak tawka tha, puan chi hrang hrang mil tura herh theih, tui thuna duh leh a khu lum (steam), duh leh tui phuh ser ser thei chi kan lei ta kha a nia. Amaherawh chu kum 2/3 zet chu vawikhatmah hmang lovin kan khawsa tih ka hre chiang khawp mai!

Nimin tuk ka hnaa ka kal tur kha - ka kawr hak tum, a khaina atanga ka’n lachhuak chu, a awmna a tawt deuh bawk nen, a lo chuar angreng khawp a. Ka hmanhmawh tawh em avangin nawt lovin ka ha ta tho va, ka thawhna hmun ka thlen chuan a chuar tih pawh a lang tawh lem lo!

Kan nau pakhat, Istiri hman uar em em a awm a, a kekawrte a nawt lo chauh thung a. A thawmhnaw, synthetic, nal deuh zak mai, nawh ngaia kan ngaih loh pawh hi a nawt zel a, a ngaih a tha em em mai a ni.

Istiri hi chuar nawh mamna atana kan hman a ni ber a. Chuar chu mar se kan tih chhan chu miin min hmuha lan mawi kan beisei vang a ni ber awm asin. Hun tlemte ah pawh thlan tla zawih zawiha kan innawh thin chhan chu thawmhnaw chuar hak kha changkang lova kan ngaih vang a ni ber.

Kan thawmhnaw azirin a chuar nawt turin Istiri sat lam pawh kan siamrem a. Tihsat sual avanga kang chhe ta sawi tur nei pawh kan tam awm e. A nawh tur azira siamrem theih Istiri kan neih phei chuan nuam kan ti em em anih hi. Hetih rual hian kan thawmhnaw azira mam dak thlarh pawh reilote hnua chuar leh mai thin pawh a awm bawk a (kan hriat vek tho kha). 

Hmanni lawk khan thawmhnaw nawh mam chungchanga kan titi naah chuan kan thiannu pakhat chuan thawmhnaw nawh ngai an neih ngai loh thu - suk anih atanga an pho dan uluk taka a enpui bakah a thleh fel leh thlap avanga nawh a ngaih loh thu a sawi a. Thenkhat chuan kan thawmhnaw te hi awmze nei mang lova kan phova kan hnawh luh bawrh bawrh avanga a chuar nasat theih thu te kan sawi zui chiam bawk a.
Kan hringnun Istiri hi kan ngaihtuah ngai em?

Kan fate hi mi hmuha mawi taka lang tura kan duh avangin kan tawngkam Istiri in kan nawt a. An lo seilenna kawngah a suk, pho leh thleh lam uluk peih lovin a rem remah kan hnawh lut bawrh bawrh a, an lo chuar hnuah a nawt mar turin a chang chuan anmahni mil Istiri sat zawng kan zawng leh si lo! 

Thawmhnaw hrang hrangin Istiri satna hrang hrang a mamawh ang hian kan fate, kan zirlaite leh kan hnuaia hnathawkte hian enkawlna chi hrang hrang an mamawh a. Cotton nawt mam thei satna chuan nylon a tikang thei ang hian kan fanu pakhat tana thatpui theih tawngkam hi kan fapa tan chuan ‘ka tawte pawh a sai lo’ a tih ang lek a nep a ni thei. Chutiang bawkin ka zirlai pakhat thatpui zilhna ka pek ang chiah kha ka zirlai dang chuan a lo chhiatpui vek thei bawk.

A chang chuan, nimina ka kawr hak, reilote hnua a chuar pawh mam leh mai ang hian kan fate/zirlaite/hnathawkte pawh hi hunin nunphung dik a thlen hun hi a awm thei tih hi hria ang u.

Bul kan tan dik chuan Istiri hmang mang lova midang tana hmuh nuam leh mawi thawmhnaw kan nei ang hian hringnun Istiri sa lutuk hman ngai lo tu leh fa leh zirlai kan nei ngei ang.

Thawmhnaw chi hrangin Istiri satna hrang hrang a mamawh ang hian, kan enkawlna dawng (tur)te hian enkawlna chi hrang hrang an mamawh tih hriain a Istiri fawng vuantute hian an mamawh tawk chiaha lum/saa siamrem tum ila, a sat lutuk avanga kang awm lovin, mam mawi tawk tak chhuah turin tan la vek ang u.

ISTIRI HMAN NUAM ULE