-Dikteii Hnamte

Infiamna lam hi ka til then lohna zawng tak mai a ni a. Naupan lai atang rengin eng infiamnaah mah hian a thiam pawl ka ni ngai lo. A thiam pawl nih loh chang a ni nang, hlahthlem ngai, áwi ngai pawlah ka tang deuh reng zawk thin. Chuti chu nimahse, tel ve kha ka tîm chuang miah lova, áwi nih pawh kha ka zak lem lo thin.

Kum a tam ve zel a, a thiam lo pawl tak ni chunga tel ve reng kha ka pawlte tana harsatna thlentu ka ni thei tih hriatna a chiang tawlh tawlh a, a kheltu aia a kotlang ‘A’ team a tel mai kha a hlimawm zawk dan ka man tawlh tawlh a, ‘kheltu’ ni lovin ‘entu’ zawk kha ka nihna tur tih ka zir chhuak ta a ni.

College kan kal ve lai chuan Sipai Lammualah khan football inkhel en tur kha a awm chho zut thin a. Pachhunga College team kha a thiam pawl tak ni ve thinin a kotlang atang khan kan au nasa thei thin asin aw. Kan au nasat poh leh kan tan zawngte kha an phur sawt ni khan kan hria a, kan hlim ve em em thin (khelmual chhunga awm ten pawnlam au riin a tihbuai phak loh thu an sawi te kha hre hek lo i!).

Television Mizoramin kan hmelhriat ve tirh te khan thenawmte (TV kan la nei ve zo lo) in atangin World Cup Football te kan en ve zeuh zeuh a, TV hmuhnawm ti ta hrim hrim chuan a awmzia hre miah lo khan Cricket te, Sakawr chung chuan intihsiak te pawh kha kan en tho mai.

A tawi zawngin - khawvel lehlama thil thleng pawh a thlen rual ruala kan lo hmuh ve theih tak hnu hian infiamna ka en uar tak ber chu Football niin F1 leh Cricket te pawh (hrethiam ve tawh nghe nghe) ka en ve ta zel a. English Premier League hi kan hun neih nen a inmil vang ni maw, kan en nasat ber a ni a, ka(n) club tan ber chu Manchester United a ni bawk.

Tan bik neia inkhel en chu ze nghet neih a har khawp mai! Thin a rim, lung a awi leh, tuemaw kan fak chiam a, a hnu lawkah chu mi ngai reng chu kan sel leh bawk a. Kan thin tirimtu tho khan min tihhlim chang a nei a, min tihlimtu tak thin kha zan mut titui lo khawpa kan rilru hliamtu a nih leh chang lah a bo lo. A boruak hi mak tak a ni (Tan zawng neia inkhel en thin chuan in hrethiam ve ngawtin ka ring).

Tichuan….. Manchester United leh Crystal Palace (k)an inkhel a. A hma lawk khan Crystal Palace tho hi 3-0 a kan hneh tawh an nih avangin ngâm sa ah kan ngai deuh a, phur pawh kan phur viau. Mahse kan phur rei lo khawp mai. Minute 25 ah si kan phur a, a tawp hun pekbelh thlengin beiseina nen kan thaw dep dep a, kan beiseina chu a thamral chiang hle! Inkhelh chanchin ka phone atanga ka en chuan kan pawl lamin ball kan chan zat chu za zela 77 (77%) a ni a, lehlam chuan 23 chauh an chang ve anih chu. Lehlam goal zawna kan ball pet chu vawi 18 niin, lehlamin kan goal zawna an pet chu vawi 8 a ni. Mahse, a tawp result chu ka sawi ang khian a chak loh zawk nih kha a ni tlat si.

Kan hringnun khelmual hi kan chhut ngai em? Eng hi nge kan hmachhawp ni a chu hmachhawp hlen tur chuan eng angin nge hma kan lak hlawm le? Midang nena chengza thin mihringte hian hlawhtling tura hmalam pana kan kalnaah hian a huhova thawh chi te, mimala beih a ngaih hunte kan thliar thin em? Football inkhelhnaah pawh mi 11 ve ve inepin an inkhel a, a hun taka a che tur dik tak a chet theihna tura remchang siam thiam apiang an chungnung a, lehlamin min beihna lai hrethiama chu lai hmun ngeia theihtawp chhuaha lo beih let thiam apiangin an elpuite laka tlawm loh dan an thiam a lo ni thin.

Tangho tur kan nih laia mahni lansarh tuma kan beih vak hian kan tanpuiteah beidawnna siamin an tha a zawi hma tih te hi kan hringnun khelmualah hian zir a va tha em. Mahni hma kan sial lutuk avang hian pawl anga hma kan lakna thin kawng tamtakah hian chakna hmu lo chiah hian kan hun a tawp fo lo maw?

Inkhelhnaa tang hote anmahni hmun theuhva tan an lo khawhna tur ruahmanna lo siam zar zartu coaching staff an pawimawh ang hian chhungkua, khawtlang, kohhran leh pawl hrang hrang hian a huhova hmalakna engah pawh mai hian hruaitu tha, a ngaihna hria leh chak tawk lohna lai thawm tur hmu thei leh a thawm dan hria kan va mamawh hlawm em.

Ball chang tam ringawt hi football inkhelhah an chak kher loh chhan hi engtizia nge ni ang? Beisei anga awm lo te, ball chang mahse a semna tur dika sem thiam lo te vang a ni ngei ang. Lehlam goalah pet tam zawk ni mah ila kan pet chu a dangtu lo awmna lai zelah anih miau chuan a pet goal theih si lova, lehlam pawlin keini lama a vengtu awm lohna lai an hriata an pet fuh si avang khan pet tlem zawk mahse an chak lo thei lo.

Kan tum ram (kan goal) thleng tura tan kan laknaah hian a huhova thawh chi (teamwork) leh a mala beih ngaih hun (goal tura pet) hi zir ang u. A huhova tih chi lo mal beih chiamin awmzia a nei lova, goalkeeper pakhat aia tam a awm theih loh avangin kan lo man ve ngawt khan hremna a tawh theih tih hriain kan goalkeeper man tur ball lo man ve phet tum lo ila. Kan hruaitu (coaching staff) ten lehlam khelh dan zir chunga kan tih ve tur min hrilh ang apiang chu thuawih takin zawm ila, tan khawh dan tur kan hrethiam ngei ang.

A tam ngawt a that ber loh chang, a tlem pawhin a tum a fuh tlat chuan a that zawk chang football inkhelhnaa kan hmuh fo ang hian, kan hringnun khelmualah hian awmze nei taka hma lain hlawhtlinna chang zel thei turin tan la ila. Dinhmun hrang hrang - hruaitu, zuitu, mal beih leh a huhova thawh ngai dinhmunah kan ding thei tih hriain kan awmna hmun theuha theihtawp chhuaha hnehna chang turin tang sauh sauh ang u.