COVID-19 hripui leng chuan kum thum hmel a hmu ta a, la darh mek zelin mi maktaduai sarih dawnin an thihpui ta a. Hetih mek lai hian vantlang nun a pangngai tawh a, mi tam berin invenna an lak avang leh an lo kai tawh avangin hri laka an taksa a inveng thei ta.

“A chi thar a la chhuak reng a, chu chuan mi tin min la tiderthawng reng,” tiin University of Wisconsin-Madison-a virus researcher Thomas Friedrich chuan a sawi.

Tunah chuan hri leng chungchang hi vantlang pawhin an ngaihven ta lo va, China atanga a darh tan atanga  a zat chhinchhiah ngar ngartu, Johns Hopkins University pawhin Zirtawpni khan an tracker chu an titawp ta bawk.

Inrinni kha World Health Organization (WHO)-in khawvelah hripui a leng tih March 11, 2020 a puan atanga kum thumna a ni ta a, hetih lai hian United Nation hnuaia hriselna viltu pawl hian emergency chu a la tawp chuang lo tih an sawi.

Kum thum liam ta chhung hian Covid avang hian ni tin mi 900 atanga 1,000 thi ziah ang an ni a. Mihringin a mihringpuiah awlsam taka a kai theih hi thihpui an tam hle a, a thihpui lo zingah pawh natpui tak tak an tam hle.

“He hri hi tunah hian ngaihven tawh lo mah se hnehna chan tumin kawng dang a la dap reng,” tiin California-a Scripps Research Translational Institute -a an hotupa, Dr. Eric Topol chuan a sawi.

“Ni khata thi zat hi a hniam tawh a; mahse, a sang angin kan ngaih a ngai. United States-ah pawh damdawi in lut leh thi zat a hniam tawh a; mahse, kum 2021 nipui laia Delta variant lo chhuah hma aiin a sang tho,” a ti.

Hri chu inthlak thei reng a ni a, a thar chhuakin a hmaa mite aia thihpui awlsam zawk pawh la inher chhuak thei reng a nih thu Topol chuan a sawi.

Hripui a len vanglaia khawvelin a chhinchhiah lama an rin ber pakhat, Johns Hopkins chuan Zirtawpni khan coronavirus dashboard an siam, hot-spot map leh thi zat leh kai zat an tar lanna chu an titawp ta a. An tihtawp lai hian khawvel pumah mi maktaduai 6.8 chuangin an thihpui hman niin an chhinchhiah a ni.

An chhinchhiahna an tihtawp chhan ber chu an thu lakna ber, ram hrang hrang sorkarten an chhinchhiahna an kalpui mumal tawh loh vang a ni a. US-ah pawh New York, Arkansas leh Puerto Rico chiahin ni tina an dinhmun thar an tar lang tawh a ni.

“Sorkar data-ah kan innghat nasa em em a, chu chu hmuh tur a awm tawh lo,” tiin a buaipuitu hotu, Beth Blauer chuan a sawi.

US Centers for Disease Control & Prevention chuan tun thlengin state, damdawi in leh testing lab atangin chhinchhiah tur hrang hrang - a kai zat, damdawi in awm leh eng ang chi ber nge hmuh chhuah tihte chu a la lakhawm reng a; mahse, a hma angin a kimchang thei tawh lo va, inhrilh zung zung pawh a ni tawh lo.

“Mite hian kan hnen atangin data an beisei a, kan ti reng thei tawh dawn lo,” tiin CDC Director Dr. Rochelle Walensky chuan a sawi.

WHO pawhin COVID-19 chungchangah hian sorkar hrang hrang chhinchhiahnaa innghatin a tichhuak thin bawk a; mahse, anni pawhin sorkar atanga an dawn that tawk loh avangin an tikimchang hleithei tawh lo va, an chhinchhiahte chu tlema hlui deuh a ni deuh zel tawh bawk a ni.