Aizawl; Covid-19 hripui lengin Mizoramah lirthei punna a nghawng lo a, nikum chhung khan Mizoram sawrkar (Transport department) ah lirthei ziah luh thar 25,391 awmin, kum hmasa lam aiin lirthei ziah luh thar a tam.

Transport department atanga ZALEN thudawn danin, nikum chhunga lirthei ziah luh thar 25,391 zinga 17,323 (68.22%) chu Aizawl district-a ziah luh a ni a, chung zinga 11,860 (68.46%) chu two wheeler a ni.

Nikum chhunga lirthei ziah luh zingah two wheeler tam berin, 16,817 (66.23%) ziah luh a awm a, Car - 3,574, goods carrier 2,435 te pawh a tam zual niin, commercial vehicle (two wheeler) 1,654 ziah luh thar a awm bawk.

Nikuma ziah luh thar hi kum hmasa 2020 aiin a tam  zawk a, 2020 khan lirthei 23,520  ziah luh thar awmin, nikum aia a tlemna chu 1,871 a tling. 2020 khan thla khatah lirthei 1,960 ziah luh thar awm ang a nih laiin, 2021-ah chuan khatah lirthei 2,115 ang vel lirthei ziah luh thar awm ang a ni.

Transport department chhinchhiah danin, kum 2014-15-a Mizorama lirthei awm zat chu 1,51,485 a ni a, hemi kum hian nitin lirthei 39 awm thar anga ngaih a ni. Hetihlai hian tun dinhmunah chuan 2,50,000 dawn a awm tawh a, nitin lirthei 70 awm thar ang vel a ni tawh. 

2021-a lirthei ziah luh dan

District           Lirthei

Aizawl           17,323
Lunglei         1,924
Siaha             748
Champhai     1,961
Kolasib         1,343
Serchhip       819
Lawngtlai     849
Mamit          424
TOTAL          25,391