DOWNLOAD OUR APP

Read latest news on your phone
app-store

HRUAITU NIH HI

Jun 19, 2022

Hruaitu mawhphurhna sanzia leh hruaitu tha lo an nih phei chuan thil an tihchhiat theih zia hi ngaihtuah phak bak a ni. Hitlera chuan Juda maktaduaih ruk chuang a tihlum a; Stalina chuan mi sang tam tak a tihlum bawk a. Gadaffi te, Idi Amina te, Saddam Hussein a te etc. te pawh hian mi engzat tan nge tawrhna an thlen hriat phak loh khawp a ni.

Reuben Lalnunthara Hnamte -

Hruaitu/hotu nih hi mitin mai hian kan chak theuh emaw tih mai tur a ni a. Hotu nih duh avanga pawl thar din leh kohhran thar din ta te pawh an awm fo thin. Hruaitu nih duh avang buaina lah ram hrang hrang leh khawtlangah te pawlah te a awm thu kan hre fo thin a. Hruaitu nih hi chu a hlu a ni ang, kan inchuh nasa thin em mai. Pawl/organization emaw, ram buaina tam tak hi hotu nih duhna avang hian a thleng tam hle a. Pawl kehdarh ta mai te pawh sawi tur a awm fo thin. Nimahsela, Hotu nih hi mawhphurhna a san zia lam hi kan ngaihtuah tel lo nge ni, he ti tak a kan inchuh a kan chak mai thin hi.

Thuawihna pawimawh zia te pawh kanin zirtirin kan inhrilh fo thin a. A pawimawhin a tul em em bawk. Nimahsela hotu in a zir loh chuan thuawihna kha min kasual tirtu leh mi dang tana tawrhna thlenga min thlen tirtu a ni daih thei thung. Germany a Nazi ho lal laia Juda te suatna kawnga thawhhlawk ber pakhat, Nazi Officer, Adolf Eichmann chu Indopui II-na zawh hnuah tlanbo a. Mahse Indopui zawh hnu fe, 1960 vel daihah Israel Inteligent tha Mossad ten Argentina ramah an man ta tho a. Jerusalem ah a chungthu rel a ni ta a ni.

Court a a chungthu rel a nih lai chu New Yorker chanchinbu tana report turin Hannah Arendt (philosopher ni bawk, Juda mi a nih vanga himna zawnga Germany tlanchhiatsantu) chu a hmunah a kal ve a. Chutiang khawpa mi maktaduai tam tak tana tuarna rapthlak thlentu chu eng ang mi nge a nih ang, engtiang taka mi rapthlak leh lainatna nei lo nge a nih tih te hriat a duh a ni. Eichmann-a chungchang rorelna a Eichmann-a khawsak dan leh a thu leh hla vel atanga Arendt-in a a hmuchhuah chu hei hi a ni: Eichmann-a thiltih hi rapthlak hle a, Juda mi maktaduai têl thihna thlentu zinga mi ni mah se, Eichmann-a chu a hmel en reng reng pawha sual hmel hliah hliah leh thisena tuihal, bumro leh tihbaiawm hmelpu a ni tlat lo. MI PANGNGAI VE MAI, NGUN TAKA NGAIHTUAHNA HMANG LEM LOVA HOTUTE THUPEK (ORDER) ZAWMTU MAI A NI… tih hi Arendt-in a hmuchhuah chu a ni. 

Hitlera thu an awih avang khan a hote khan Juda maktaduaih tam tak an suat a ni mai lova, German mi pawh an thi hnem hle. A tuar nasaber tu chu pawisawilo te an ni. Hitlera chu tun thlengin khawvela Dictator nunrawng ti a hriat a ni  tlat reng a ni. Putina pawh hian a thupek avanga pawisawilovin an tuar nasat zia hi rapthlak tak a ni. Hruaitu chu thutihtlukna siamtu a nih nghal avangin, a thu tihtlukna a dikloh chuan mi sang tam tak tan tuarna thlentu a ni thei a ni. Keimahni tawkah hian hruaitu kan nih theuhna leh kan pawimawh hi a awm a. Nu leh pa te pawh an fa te tan hruaitu an ni. Àn fa te an hruai dan a dik loh chuan chhungkaw kehchhia leh belh tlakloh alo piang mai dawn a ni. Vawikhat chu video cassette la uar lai khan, thil zawt tura  in pakhatah hian ka lut zawk chu an fapa naupangte nen an nu leh pa chuan film duk dak lo an lo en a,  ka chhuak leh rang khawp mai. An fa te hmakhua tur chu a eng hran lo maithei.

Zirtirtute pawimawh zia hi ka ngaihtuah thin a, Primary kan kal lai a kan Zirtirtu te kha tun thlengin ka la zah em em thin. Zirtirtute chuan naupang chu kawng dik lova an hruai a nih palh chuan chhungkua leh khawtlang tana mi hnawksak an siam tihna ni mai dawn a. Kawngdik taka an hruai a nih erawh chuan Ram leh khawtlang, chhungkua thlenga mi hmantlak an lo chawrchhuak bawk ang. Hruaitu kan nihna hi thil namai a ni lova, kan tawngkam khat leh kan chet dan te hian kawngro a sut em avangin kan pawimawhzia hi in hre nawn fo teh ang u. Pathian thu lam kawngah pawh mi tam tak chu kawng dik lova hruai theih a ni a. Chutiang ang rinna kawng diklo a hruaitu te chu khawvel huap  pawhin kan hre fo tawh. Mi sang tam tak thihna leh tawrhna thlenin, mi tam tak hruaibo an ni thin a ni. Kan ramah ngei pawh kan hre tawh thin a, an in leh lo te tlansan leh an hna thlenga tlansan a kalchhuak te an awm thin a, mi tam tak tih at in awn awm a, rinna kawng an tlanbosan a ni.

Chutiang bawkin Nu leh Pa pawh hi chhungkaw hruaitu kan ni a. Kan chhungkua kawng dik lova kan hruai hlauh chuan khawtlang leh ram tana mi hnawksak, kan chhungkaw tahna thlen tirtu an lo ni mai dawn a. Family planning nei mumal silova nupui/ pasal neih ve ngawt te, fa neih ve ngawt a enkawl tha leh mumal si lo te hian mi tha kan hringchhuak mawh hle ang. Mi tamtak chuan Khawtlang a ni emaw, ram emaw, pawl engemawah te hruaitu nih hi a khelhin an khel takmeuh a.Hruaitu nih loh chuan pawl tibuai tibuai mai chi te mi tam tak an awm. Hetiang mi chu hruaitu pawh ni se hruaitu tha tak chu an nih a rinawm chiah loh a ni. Hruaitu mawhphurhna hi a sang em em a, chaka khelh vak chi pawh a ni lo; kan duhna chhan tam ber hi chu sum leh paia hauhsakna, lar duhna, thuneih duhna a ni tlangpui. Ram changkangte anga ram siamthat duhna emaw, pawl siamthat duhna emaw hi chu a hming leka kan campaign hla a ni maiin a lang.

Hruaitu mawhphurhna sanzia leh hruaitu tha lo an nih phei chuan thil an tihchhiat theih zia hi ngaihtuah phak bak a ni. Hitlera chuan Juda maktaduaih ruk chuang a tihlum a; Stalina chuan mi sang tam tak a tihlum bawk a. Gadaffi te, Idi Amina te, Saddam Hussein a te etc. te pawh hian mi engzat tan nge tawrhna an thlen hriat phak loh khawp a ni. Anmahni kha mi ten anchhia an lawh a, chu anchhia chuan anmahni a tawrhna a thlen te hi ava rapthlak em! Hruaitu chuan dik taka tilova mi tam tak tana tuarna emaw, rilru natna a thlen a nih chuan chu anchhia chu anmahniah a thleng leh thin. Hruaitu I nih chhungin mi te tana malsawmna I thlen nge? Mi te tana rilru natna leh tuarna I thlen zawk? Hmanlai mizo lal kan tih hote pawh kha an khawnbawl upate thurawn pawm a rorel thin te kha chu lal fing leh khawtlang tan pawh hmasawnna leh khaw nuam tak an siam thin. America President te pawh hi an lal hle in kan hria a ni maithei. Mahse, an khawbawl upa ho( Congress) hote thurawn pawma rorel thin te khu chu an chesual tam lo fo. An thu thu in thil an kalpui ngawt bik lo a ni. Hruaitu kal fawr lutuk te chuan rei an daih ngai lo.

Khawvela kan awm chhung hian hruaitu bik hi awm loh theih a ni lo. Pathianin kan inawpna leh kan kalphung tura min duansak a ni miau a. Amaherawhchu, a chak a chak a, khelh lo erawh a him fo. Mi ten hruaitu ni tura an thlang che emaw, an ruat che a lo nih pawhin, mahni hmasialna leh chapona paihthla a, ram, kohhran, pawl hruaitu tha tak leh ram leh pawl tana hmasawnna thlen tura theihtawp kan chhuah kha kan mawhphurhna a ni. Chutiang ni lova, thuneihna hmansual emaw, duhsak bik neih emaw, mahni hmasial tak hruiatu I nih chuan I hunlaiin ropui hle in lang mah la, mi te thinlungah hmun I chang lovang. Thuneihna leh hauhsaknate, ropuina avanga inluling taka ro I rel chuan  a sawp chu nasa tak a ni. Mihring hi kan pangngai reng lo; kan hmuh hniam em em te, kan lo hmuhsit ruk em em te pawh, mak taka dinhmun tha an rawn luah hun a awm leh mai thin. Lal Isua anga tlawmna nun nena  dik taka hruaitu dinhmun I luah chuan mi te tana malsawmna niin, miin an theihnghilh tawh ngai lovang che.

Share now