Aizawl May 14, 2024 : Mizoram Board of School Education (MBSE)-in vawiin chhun dar 12:00 a High School Leaving Certificate (HSLC) 2024 result felfai tak, a tichhuak thei chu MZP chuan lawmawm an ti a. MBSE thawktute thawhrimna leh inpeknaah MZP chuan lawmthu an sawi a ni.

MZP chuan kumin HSLC exam result a titha zual, top ten-ah Mizo zirlai mi sawm pathum (13) an lang chu lawmawm a ti a, tunhma result nena khaikhin phei chuan hmasawnna lian takah an ngai a ni.

MZP chuan zirlai hlawhtlinna chang zawng zawngte an lawmpui a. Chutih rualin, la hlawhtling ve rih lote leh Comparmental chance la neite pawh beidawng mai lova, rilru thar nen hmalam pan turin duhsakna an hlan a. A lehpekah chuan hlawhtlinna chang ngei tura bei turin MZP chuan duhsakna an hlan nghal a ni.

MZP chuan, HSLC result chhuakah nikum 2023 aiin zirlaite pass an thahnem zawk chu lawmawm an ti hle a. Nikum khan zirlai HSLC Exam hmachhawn zingah 71.14% pass-in, kumin HSLC result chhuak-ah hian zirlai 73.37% an pass thung a, hei hi hmasawnna ropui takah MZP chuan an ngai a ni. 

MZP chuan kum 1995 atanga a lo tih thin angin, HSLC Top-10 a Mizo tlingte a chhuan zia leh duhsakna lantir nan leh Mizo zirlaite inkarah inelna thianghlim a awm theih nan May 23, 2024 (Ningani) hian Vanapa Hall-ah anmahni chawimawina hun a buatsaih leh dawn a ni.

MZP-in kumtin a buatsaih thin, Inter High School Quiz 2023 a tel zirlai zingah HSLC Top-10 a tling an awm nual chu MZP chuan lawmawm an ti bawk a ni.