- Lalchhandama Colney Khawvel a lo thang chho zel a, a ken tel chi hrang hrang avang chuan kan ramngawte kan tichereu nasa hle a, hei hian a ken tel leh chu nungcha leh ramsate chenna nasa taka lo chhe ve zel hi a ni. Industry, factory lian te kan nei ve lo chung hian kan tichereu ve nasa hle a, kan ram hruaitute leh dept. lam tena an humhalh viau chung pawh hian. Ram changkang kan entawnho – Korea, Singapore, U.S., etc, angah te hi chuan an inzirtirna a rei tawh a, ramngaw an nei tha thin hle. Tin, nungchate pawh an zalen em em a ni. Khawvel hian an pawimawhzia hi a hre chiang tawh a, chuvang chuan, hma nasa takin a la sauh sauh zel dawn a ni. Keini Zofate pawhin bengsika kan ngaihtuan ve a ngai, tuna kan hmalaknate hi a tha tawk viau a; mahse, mi mal tin thleng phak tura kan beih a la ngai nasa hle. Thingkung leh hnim lam chiho pawimawhna han sawi dawn ta ila. A pakhatnaah chuan boruak thianghlim [Oxygen] siamtute an ni, chu mai bakah kan thawk chhuah boruak bawlhhlawh [CO2] lo hip ral zel tute an ni bawk. Oxygen man hi damdawi in lama hmang thinte chuan an hria ang a, bur khat lek pawh hi cheng fe a ni zel a ni, a lei aralah chuan. Thingkung pakhat hian kum khat chhunga oxygen a siam chhuah zat hi cheng nuaih fe zu ni a. Heng thingkung leh hrinna nei chiho hian boruak an vawng dai a, leimin tur pawh nasa takin an veng thei a ni. Tin, tuihnate pawh an siam a, lei chunglang tha luang ral mai turte pawh an veng a ni. An han hring dup mai hi chu mit tante pawh a thain a hahdamthlak hle a ni. Nungcha leh ramsate tan chenna in nuam tak an ni a, keini tan pawh thingzai, etc, thil chi hrang hrang a hman tur min petu an ni. Ramngawte hian sik leh sa chung thuah pawh hian nasa takin nghawng an nei a ni. Nungchate pawimawhna lam han sawi dawn ta ila. Thingkung leh a dang hote inthlah chhhawn/pun zelna atan hian an pawimawh hle a, ramsate chu kal sawn kal sawn an ni a; tichuan, an chi emaw te kha hmun hrang hrangah an lo tidarh ve thin a ni. Sakeite pawh hian sakhite an ei thin a; tichuan, an tam lutuk tur kha a lo tiziaawm ve thin a ni. Sahara thlaler pawh khu an tia lawm, hmanlai chuan,hmun hring nuam lutuk a nia; mahse, lal hote khan sakei awm thin te kha an kap mang vek a; tichuan, sakhi lam chihote kha an lo puang ta vak a, hnim hring zawng zawngte kha an pet zo vek a, a lo rei hnu chuan tikhuan hmun roah, thlalerah a lo chang ta a ni, an ti. Rulte pawh hi kan hre theuh ang a, an chaw ber chu sazute hi an ni a, sazu lo tam lutuk tur vengtute an ni. Sava chi hrang hrangte pawh hi an mawiin, an han hram chiah chiah hi chu mi a tihlimin, tinuam ve thei hle a ni. Scientist-te pawh hian an laboratory-a thil chi hrang hrang zir nan leh enchhin nan nungchate hi an tangkaipui em em a ni, inmamawh tawn vek kan lo ni. Kan ram hi ngaw tha tak thin a ni a; mahse, tunah chuan a hrin dupna bak chu ngaw han tih tur kan nei tha tawh lo hle. Mihring kan pun zel avangin thing leh mau hmunte chen nan kan siam zel a, chu bakah kan loneih dan in a zir loh avangin kan tichereu nasa tawh hle bawk. Thing phunte kan han uar thar a, a tha hle a; mahse, kan thing phunte kan enkawl zui zel a tul hle. Nungcha, ramsa, chungchang thuah hian mi thiamte sawi dan chuan a chi hrang [Variety] hi kan nei tha hle a; mahse, a tam lam [Quantity] lamah hian kan pachhe tawh hle an ti. Daiah han kal ila, sava eng eng emaw hmuh mai tur chu a awm ve a; mahse, an ti hle, min hmuh ve leh an tlanchhe vang vang thin, ringtute kan inenfiah a tul hle mai. Awareness campaign-te kalpui zel a ni a, Mizote chu zirtir kan nuam a, hma pawh kan sawn zel a beiseiawm. Kan thing leh ramngaw la neih chhunte kan humhalh that a ngai, kan mamawh atana kan lak pawh a rulh nan a dang kan phun ve leh zel a tul. Kuthlei nana hman phei chu a tih a tih tawh loh tawp tur a ni. Lo neiha eizawng kan tam ber a; mahse, kan lo neih dan a tha tawk lo hle. Ramngaw kan vat a, kan hal leh chiam a, hei hi chu kan thil tih fuh loh ber; mahse, tihngaihna dang kan hriat si loh a ni. Ramsa leh nungchate pawh kan humhalh that a ngai, chuti lo chuan an rem zo mai dawn. Sa pelh leh thangkam tih te, tura hrai tih hi kan sim hlauh a va hun ta em! Kan lui dungte pawh kan suar tluan nasa lutuk thin a, tur, generator, etc, tih vela kan han bei mai thin hi chu a zia lo ngawt mai. Ram neitute kan than harh a ngai, chuti lo chuan kan ramsa, nungchate leh kan thing, ramngawten min tlanbosan zo mai dawn. Kan thil hriatsa vek tawh ka han sawi ve leh a ni a; mahse, thil hi a lo rei deuh chuan kan theihngilh emaw kan la zuai leh deuh mai thin a, chuvang chuan kan han tar lan tak te min tiharh thar lehtu atan emaw a that ka beisei. Eng pawh nise, kan ramngaw leh nungcha, etc, lo pun deuh deuh nan hian mi tinten mawhphurhna kan nei a ni. I humhalh zel ang u.