DOWNLOAD OUR APP

Read latest news on your phone
app-store

Hun leh ni te

Jan 09, 2022

Ngaihtuahna thar nen bul kan tan theih nan in lo thlir ho zel dawn teh ang

- Lalchhandama Colney

Hripui leng rapthlak leh nasa tak karah kumthar dam takin kan chuang kai thei, a lawmawm in ropui hle mai, Pathian hnenah lawmthu i sawi mawlh mawlh zel ang. Nikumah hri avangin nasa takin buaina kan tawk a, tun kum ah eng nge kan an dawn le. Sawrkar hnathawk leh a kaihhnawih te chauh lo kha chuan kan hlauh nasa anih kha. Eng pawh nise,kan hma hun tur kan sawi lawk thei lo va, hri lo reh tawh pawh nise, buaina dang kan tawk thei tho a ni, Pathian thu thu a ni e. Hunpui kan hmang zo chiah a, kan hman danah erawh Pathian a lawm ang em lawm lo ang em tih chu ngaihtuah tham tak niin ka hre bawk. Kan ni tin hna leh hreselna lamah te a malsawmna hi dawng tlak kan inti em aw, thenkhatte hi chu kan dik lo lulai ve bawk thin a, chuvang chuan kan hmuingil hlei thei thin lo a ni. Kum bulte kan han tan leh dawn a ngaihtuahna thar nen bul kan tan theih nan in lo thlir ho zel dawn teh ang.

Hringnun khawvel: Mihring hian eng nge maw a dam chhan le, ei leh in, silhfen, in leh lo te hi em mi ni ang le. Mihring hian lungawina tak tak a nei lo, a dang a duh belh zel a ni. Leiah kan lo piang a, naupang kan lo ni a, nula, tlangval kan lo ni leh a, nu leh pa, a tawpah tar kan lo ni a; tichuan, thlanmualah phum boin kan lo awm leh thin. Kan lo pian atanga kan thih ni thlengin harsatna, mangannaten a khat tawkin min chim reng thin. Mahse, hengte hi mihringte min siam thatu, hlimna leh lawmna min pe/siamsaktute an lo ni ve leh thin. Mihring chu a thawhrim phawt chuan alo hlawhtling a,hlim thin a ni, tih hi kan hre hlawmin ka ring. Hetih lai hian thawk tha peih lote erawh an lo rethei a, nguai thin. Pathianin tumah duhsak bik a nei lo a, angkhatin ni a chhuahtir a, tlaktir leh thin, mi zawng zawng ni khatah darkar 24 theuh min pe a; mahse, kan dinhmun erawh a inang lo hlawm hle. Heng zawng zawngte hi khawvel zia, hringnun khawvel a lo ni e.

Damrei Nghah Thil: Krismas leh kumthar kan hmang zo chiah, hmang leh tur chuan hun rei tak nghah a ngai tawh, a tawi zawngin damrei nghah thil a ni reng tawh mai. Sawi leh sawi hnu Mizote hian kutpui hi kan nei mang lo hle, krismas leh kumthar hi a ni deuh rawt mai. March thla-ah chapchar kut kan nei a,a hlimawm thin viau a; mahse, min huapzo lutuk lo,tlai lamah phei chuan a nu viau tawh thin a ni, an ti. Kohhranten inkhawpuite kan nei thin a, thalai inkhawmpuite phei chu a hlimawmin ropui ve viau mai. Heng tih loah chuan mo lawm, picnic, chaw eikhawm, tih te kan nei leh a, hlim chu kan hlim ve viau tho. Heng kan han sawi hote hi chu kan ngaihtuahnaah/suangtuahnaah chuti takin a cheng ve lem lo, kan hmang liam ve satliah mai thin. Krismas leh kumthar erawh kan suangtuangnaah a riak a, kan then tak lungduh zawng zawng te leh pan lai nun zawng zawngte mi a phawrh chhuahsak thin a ni. Mahse, sawi tawh angin hun rei tak nghah leh phawt a ngai, dam rei nghah thil a ni leh reng tawh mai.

Eng Kawng Nge I Zawh Dawn?: Kum alo thar,eng kawng nge i zawh leh dawn le? Kawng chi hnih zawh tur kan nei, a pahnihin a zawh kawp theih loh, pakhat zawk thlan chuan chu chauh chu,kawng inpersan tak a ni. Kum bul atangin zu i in leh zeuh zeuh dawn nge,dawt te pawh sawi ve leh zeuh zeuh thin dawn. Kohhran hruaitu ni chungin i hlepru leh thin dawn nge, a tul hunah chuan dawt/thu dik mang lo te pawh sawi ve leh thin dawn. Ram hruaitu tha tak ni chungin mahni inhaivur, dawt hmanga mipui bum te kan la ti zel dawn. Kawng pakhat zawk chu kawng hrehawm tak mah se, a tawpah chawimawina, hlimna a ni. Chu kawngah chuan miin dawt a sawi duh lo a, dawt sawi ai chuan chan a inhuam zawk a. Miin an tih sup sup lai pawn a ti ve duh lo, zu hi thil tha lo tak a ni tih a hria. Hlep ruk theihna rem chang tak a awm pawn a insum hram hram thin. Ram hruaitu tha tak a ni a, ram tan eng kim a ti a, sum tam tak aiin hmingthan a thlang zawk a ni. Awle, eng kawng zawk nge kan zawh leh dawn le, duhthlanna chu kan kut a awm a ni e.

Piputen, “Hun leh tui lianin tumah a nghak lo,” an ti a, ni e, tui lian pawh hi a luang hum hum a, a luang zo duak mai thin a ni. Chutiang bawkin hun pawh hi a awm mai mai emaw kan tih chhung hian a lo kal duak ve thin a ni. Kan hun kal tawhte kan ko kir thei tawh lo a, inen nan erawh kan hmang thei. Thufing chuan-kum 100 dam tur ang in hna thawk la, naktuka thi mai tur ang in tawngtai rawh, a ti. Chuvang chuan kan hunte hmang tha ila, mi dangte tanpui nan, hnathawh nan, mipat hmeichhiat a insum nan, thu dik chauh sawi nan, inkhawm nan, Bible chhiar nan, tawngtai nan. Mihring hi a lo hlawhtlina, hausak viau pawn a tawpna tur chu thlanmual tho a ni. Chuvang chuan duham chin tawk nei ila, kan dam chhan ber hi sum leh pai a ni lo. Mihring chu hriselna tha tak nena hlim taka nun hi a ni ber lawm mi a tum, a awm dan tur ber chu. Awle, eng eng emaw ni te kan han tlak ta duah a, kan thlir dan leh hmuh dan te a inzawl hlawm emaw ka hre lo,eng pawh nise, dam takin kum 2022 kan chuang kai, kumthar chibai vek ule.

Share now