St. Stephen's College, Delhi atanga Economics graduate Siddartha Lal-a'n a enkawl hnuah Royal Enfield in hma a sâwn nasa hle a, India ramah mai ni lo, Asia ram dang, Europe leh North, South America ah te an inzarpharh nasa hle.

November 2020 a 350 cc class a, a hmasa atâna push-rod hmang lo Meteor an tlângzarh khân hripui lên lai ni mahse India ram leh ramdangah te ngaihven a hlawh hle a, engine khalh nuam, dam tak mai, nghawr nei tlêm tak a ni nên mi thar tam takin Royal Enfield an bawh a. Classic Reborn-ah Meteor-a an hman tho J-series engine hmang nimin lamah an tichhuak leh a, a 'tuning' an tidanglam hret a, hei pawh hi mi tam takin an bawh leh bawk.

Nikum chawhnu lam atang  tawhin 'bike' thar, zâng zâwk, seat hniam zâwk, tihkual vêl nuam lehzual tur RE in an siamchhuak dâwn tih chu lirthei ngaihven tute sawi a ni zui a, ARAI(Automobile Research Association of India) lam aṭangin a hming tur hi tih 'leak' ni ngei a rini, 'Hunter 350' chu beisei ang ngeiin August ni 7, 2022 tlai, India sana a dar 5:30 pm khân Bangkok, Thailand ah live streaming a phochhuah a ni a. Hemi ni hian booking pawh hawn nghal a ni.

Aizawl-a Royal Enfield dealer Lawma Enfield ah pawh August ni 8, 2022 khan nula rider pahnih Rosalyn Lianhmingthangi (Rosalyn Lushai Gal) leh Lalhriatpuii (Mahriati Tuallawt) te'n an khuh hawng ve a, ngaihventu an thahnem nghal hle.

Hunter 350 hi J-Series engine J1C 349.34 cc single cylinder four stroke SOHC engine hmang a ni a, 20.4 PS@6100 rpm leh 27NM @4000 rpm power a pe chhuak a ni.
Retro Hunter, spoke wheels hmang chi, rawng chi hnih leh Metro Hunter, alloy wheels, tubeless wheels hmang, rawng chi 6 a awm a. Showroom price ₹1,49,000, ₹1,63,900 te leh ₹ 1,69,900 man te a ni.

Lawma Enfield, Sikulpuikawn, Mission Veng ah dawr hawn ni ah a duh tân test-ride theihin a awm reng a ni.