ZALEN, November 08, 2025: CK Hyundai chuan Inrinniah a showroom, Bawngkawnah mi 35-in an hauh lawk Venue chhuak thar an tlangzarh a, tel tura sawm bik zinga miten a tak an hmuh hnuah an hauh lawk ve leh nghal bawk.

Dealer Principal Joseph Lalchhanhima chuan, “Tlangzarhnaa rawn tel zingah hauh lawk zui ve nghal an awm a, Venue hi chu a chhuak hmasa pawh kha kan car zawrh zinga kan hralh theih ber a ni sa hrim hrim,” a ti.

Mizo infiammi zinga hriat hlawh, Lalrina Renthlei chuan khuh hawngin, Hyundai car a neih thin thu leh car eng emaw zat a khalh tawh zingah Hyundai chu ama milpui zela car khalh nuam ber leh rin tlak nia a hriat thu a sawi.

CK Hyundai Digital Head Lalruatfela chuan, “Venue hmasa nen a sei zawng inchenin metre li chin compact SUV a ni a, tuna a thar hi a liana a sang zawk bawk a, chuan nuam leh thawl zawka chen theihna tur a ni,” a ti.

Hyundai hian an car model hrang hrangah a pangngai leh a bika siam N-Line an tichhuak thin a, Venue thar hi chi hrang pariat awmin a pangngai leh N-Line-ah rawng chi hrang pariat ve ve a awm a. Him tha zawk tura thuam thar a nih bakah driver puitu khawl changkang zawk bilh telin a chhung an chei dan leh kawng hrang hrangah a chhuak hmasa aia tha tura duan a ni hlawm.

May, 2019 khan Venue hmasa ber tlangzarh a ni a, thla liam ta thlengin India-ah 80,000 chuang an hralh chhuak hman a. Hyundai-in SUV a siam chhuah zingah Creta tih loha India rama a hralh tam ber a ni a, Mizoramah erawh Venue an hralh thei ber ve thung a, kum ruk chuang hnuah a thar, chhuan hnihna an tichhuak.

Mizoramah a man tlawm ber, Rs nuai 8.1-in a lei theih laiin a to ber Rs nuai 15 vel a ni ve thung.

CK Hyundai chuan hma an sawn phah ngei an beisei a; chutih laiin, Hyundai Motor Company chuan tunhnaiah India ramah hmasawn zel tumin hman tur Rs tluklehdingawn 450 an ruahman a, hei hian Mizoram pawh a nghawng tel ngei an beisei bawk.

Tlangzarh inkhawmah hian Ningani zana thlan zawh tak Mizo Idol-a a sang pathum an zai vek a, Youth Icon 2024-a pahnihna, Peter Lalnunpuia a zai bawk.