Hma lam hun tur han tih ngawt mai chu eng nge maw ni le, kan ti thei ang. Nia, mihringte hian hun chi thum kan nei a - hun kal tawh, tun hun leh lo la awm tur. Heng zingah hian ‘tun hun’ hi a pawimawh ber ang, han ti ila kan tih sual ka ring lo.

Hun lo la awm tur a mi hriat châk hian ai-te kan en a, kut zia, horoscope-te kan en bawk thin. Tin, zawlnei inti thenkhatten an hrilh lawk bawk thin - lungpui a lo lum dawn tih te, chhiatna rapthlak tak a lo thleng dawn tih te; mahse, kan vannei nge ni, vawiin thlengin kan la tawng lo.

Sawrkar, pawl leh mi mal ten tum siamin, tun atanga kum 5/10-ah chuan hetiang hi kan ti ang, a letin kan tipung ang; tin, mi malte pawn tum (ambition) kan siam bawk thin.

Ruahmannate hi chu kan siam lawk chiam chiam thei a; mahse, a hlawhtlinna thleng tak tak tur chuan harsatna eng eng emawten min tibuai leh mai thin. Heng ruahmanna kan siam thinte hi kan hma lam hun atana kan tih theih tawk a ni deuh ber mai, engtin nge i’n lo thlirho zel dawn teh ang.

Vanduai/vannei: Leilung danah mi tha leh fel, dik te hi chu kawng engkimah tluang leh tha taka kal chho zel tura rin an ni. Thil tha leh malsawmnate pawh dawng tura ngaih an ni.

Hetih lai hian mi tha lo, hlep ruk ching, dawt sawi hmang, etc. te chu a tawpah chhiatna/manganna nasa tak emaw tawng tura rin an ni. An lo tawng ta a nih paw’n miten mak an ti thin lo, “A tawng har zawk ngawt alawm,” te kan ti thin. Mahse, mi tha leh fel tak tak sawisel bo turte pawh hian vanduaina rapthlak tak, chhiatna eng emaw tak han tawng ta tlat hi kan awm ve bawk a. Chutiang bawkin mi tha lo, fel lo takte paw’n malsawmna, vanneihna ropui tak tawng ta tlat kan awm thin bawk a.

Nia, heng mite hi chu khuarel piah lam (Exceptional case) te han ti ila, a ni thei mai ang chu, thil thleng tam lo tak a ni. Angkhatin ni a chhuahtir a, a tlaktir leh thin, Pathian rorel dan a ni e. A khai khawm nan chuan, “An vannei hle mai, vanduai hle mai,” i ti mai ang.

I hma lam hun tur chu: Bible-ah hian chiang takin mihringten kan tuh rah kan seng zel dawn, tih min hrilh a. Miin thil tha lo a tuh chuan nakinah thil tha lo vek a seng dawn, chutiang bawkin thil tha a tuh chuan chu mi vek chu a seng leh dawn.

Miin huanah maian a tuh chuan maian a seng dawn, Vaimim chu a seng daih dawn lo, chuvang chuan eng nge kan seng dawn le? Hma lam hun tur chu Chung lam chauh lo chuan hre lo mah se, heti hian a lo thlir lawk ve theih a ni.

I hun kal tawh zawng zawngte han thlir kir teh le, eng tih nan nge i lo hman thin deuh ber? Zu in nan te, hlep ruk nan te, dawt sawi nan te, hur nan te a i lo hman thin chuan, i hma lam hun tur chu eng vak thei lo vang.

Chutiang bawkin hnathawh nan te, mi dangte tanpui nan te, tawngtai leh Bible chhiar nan te a i lo hman thin chuan i hma lam hun chu êng turah ngai rawh. Sawi tawh angin kan tuh rah kan seng dawn; tichuan, i hun kal tawh atangin i hma lam hun tur chu i thlir thiam thei ang.