Bangalore-a Indra Nagar petrol pump lian tak pakhatah Hmarchhak tlangval hlir hnathawk lo tei suau suau ka zuk hmu thut mai chu min barakhaih chiang hle mai. Zarkawt, Ahimsa i kal pel thin a nih chuan bawngsa dawr 3/4 ah Bihari tlangval rual sa sat i hmu fo thin bawk ang.

Zoram pawnah hmarchhak mite hnathawkin an chhuak nasa a; mahse, hetianga hmun khata hmuh tur hi an tam lo hle. “A tirah chuan tualchhung mite nen kan thawk a, 4 kan thawk phawt a, chumi hnuah min ruai tute’n in zawn belh turin min tia, kan thiante kan sawm belh zel a, a tawpah 32 lai kan ni ta a, darkar 8 theuh kan thawk a, ni tin ‘shift’ thumin kan inthen a ni,” tiin an zinga thawk rei deuh ber tawh chuan min hrilh bawk a.

Pump enkawltu chuan a hma chuan tualchhung tlangval leh Hmarchhak mipa te an chhawr thin a, a neitu lam an inthlak hnu chuan khawl changkang leh tha zawk bun a nih bakah khauh zawka enkawl a nih zui tak avangin tualchhung mi te chu an thlawn zel a. Khawl tihchingpen theih a nih tawh loh vangin a thawkte an kiam zel a, hmarchhak tlangvalte chu rintlak zawka hmuin zawi zawiin an lak belh zel a, thla 2/3 chhungin hmarchhak hlangin an enkawl ta niin a sawi bawk a ni. He petrol pumpa thawk mekte hian thla khatah cheng 15,000 an hlawh a, a hnung lamah an khawsakna tur hmun pek an ni bawk niin hnathawk pakhat chuan a sawi bawk a ni. Kan tlangvalte hi an taimak zawk vang leh an rinawm zawka ngaih an nih avangin an chet theihna mualah chuan tualchhung mi an nek chhuak rap thei a ni.

Pathianni zingah bazar sa zawrhnaah hnam dangin bawngsa an ser thin a. Chumi hnu deuha hawn tak, Zarkawt ‘bawngsa valley’ an tih thinah pawh kar khatah vawi 3 an ser thin bawk a. A tirah chuan an hnam dang puite’n an pan thin a, tunah chuan Mizo dawrtu nghet tak an nei fur tawh a ni. Engvangin nge hetiang thil hi kan kawtkai-ah a thlen theih? “A bikin bawngsa ser zingah duhlai tak kawh chata min hleh sak theitu hmuh fuh loh chang an awm fo thin a, a ‘thin’ lei dawnin a ‘kal’ tel chang a awm a, a ti tha hlang kawh pawhin a ‘duar’ a lo tel hman zel a. Ka duh ang zana ka leina theihna hmuh hi kan pan lo thei lo,” tiin kan lei laia lo lei ve nu pakhat chuan a sawi bawk a ni.

Eng pawh nise, ‘i ram leilung pawh ni se, i thawh tawkah rinawm leh ngawrh taka i thawk lo a nih chuan luahlanin i awm ang a - hnam dang tlangval pawh an la ni mahna.’